Disko Line Kristian Jeremiassenip isornartorsioqqippaa

Kristian Jeremiassen, qanittumi Inuit Ataqatigiinnut nuuttoq, Disko Linemik iluarisimaarinninngivippoq.

Tassuma angalatitseqatigiiffik sakkortuumik isornartorsiortarpaa, maannalu aammaarluni angalatitseqatigiinnut ammasunik allagaqarpoq.

- Helikopteri Qasigiannguanut mimmat, timmisartortartup ilaasullu namminneerlutik kuffertit usingiartariaqarpaat. Sulisoqanngilarmi, ilaasullu aalassatillutik silami qiianaqisumi utaqqisariaqartarput, taanna Disko Linemut allakkamini ammasuni allappoq.

Atuaruk: Kristian Jeremiassen: Angallannermi piareersaasiortoqanngitsoq

Inuit aningaasanik annaasaqartarput
Sooq ilaasunik sullissisunik sulisoqannginnera Kristian Jeremiassenip paasisinnaanngilaa.

- Pissutsit allanngortinneqanngippata, tamanna angalasunut aarlerinartorujussuussaaq, innarluutillimmi utoqqaallu qanoq ililluni ikiorneqassagamik, taaa aperivoq.

Kinguaattoornerillu amerlavallaartut, taanna oqarpoq.

- Ilinniagaqartut tamatuminnga eqqorneqartarput, sulisullu piffissaq suliffissartik annaasarpaat. Disko Line Qeqertarsuup tunuani angallassinermik ajornerulersitsivoq, naak pitsanngoriartoqarnissaanik neriorsorneqaraluarluta pissutsit ajorsiartuinnavipput, Kristian Jeremiassen erseqqissaavoq.

Taamaammallu taassuma apeqqutit uku angalatitseqatigiiffimmut saqqummiuppai:

Disko Linep helikopterit amerliniarpai?
Kinguaattoornerit ikinnerulersinniarlugit Disko Line qanoq iliuuseqarpa?
Kinguaattoortoqartillugu inuit aningaasanik annaasaqartarput. Kinguaattoortoqartillugu Disko Line inunnut aningaasanik tunisisaassava?

Atuaruk: Kiffartuussinissamut isumaqatigiissutit isumaqatigiissutaareersut atorunnaarsinneqarsinnaanngillat