Disko Line: Qulimiguullit amerlanerit aaqqissutaanngilaq

- Uagut Disko Line-iminngaanniit Kalaallit Nunaanni angallattakkatta angallassinermut isumaqatigiissutip piumasaqaatai malillugit sullinneqarluarnissaat soorunami kisiat soqutigaarput.

Taama allappoq Disko Linemi pisortaaninngorlaat Finn Hansen, Kristian Jeremiassenip (IA) suliffeqarfimmut isornartorsiuilluni apeqquteqarnerata kingorna.

Disko Linep kiffartuussinissamik isumaqatigiissutit ukioq manna tigummagilli, Kristian Jereimiasseni isorinnittuarsimavoq, tassani oqaatigalugu angallannerit malunnaatilimmik ajorseriarsimanerarlugit.

Atuaruk: Disko Line Kristian Jeremiassenip isornartorsioqqippaa

Aaqqiissutaanngitsoq

Allakkanik ammasunik allangaqarnermini angallatsitsivik aperisimavaa qulimiguullik amerlineqarniarnersut.

- Qulimiguulinnik amerlanerusunik ikkussinissaq ajornartorsiutinik matussusiisinnaanera takorloorsinnaanngilarput. Ukiuuneranimi aallanngittoortarnerit taamaatitsiinnartarnerillu amerlanerpaat silamik tunngaveqartarmata, taamaalillunilu qulimiguulimmik angallassinissaq ajornartarluni, Finn Hansen akissuteqarluni allappoq.

- Timmisartortartulli naliliigaagata sila timmiffissaasoq, taava ingerlaannaq timmeqqilertarpugut, soorunami timmisartortartut qasuersernissamut malittarisassaat ataqqillugit. Sillimaniarneq tamatigut salliutinneqartarpoq. Eqqaarusupparpullu, qulimiguulimmik angallassinitta piffissap annersaa timmisartortartumik allamik aamma pissamaateqarsimagatta, taamaalilluta kinguaattoornerni angalanissanik nutaanik ikkussinissatsinnut periarfissaqarumalluta.

Atuaruk: Disko Line nutaamik pisortaanertaartoq

Ataasiaannarluni pisoq

Kristian Jeremiassenip tupigusuutigisimavaa, sooq mittarfeqarfimmi sulisoqarsimannginnersoq, tassa timmisartortartup ilaasulli nammineerlutik pisattatik apuuttariaqarsimammasigit.

Finn Hansenilu oqarpoq, tamanna Mittarfeqarfiit akisussaaffigingaa.

- Ulloq maajip 10-t pisuuvoq ajoraluartoq. Tamanna ilaasussanik sila pissutigalugu kinguaattoornikunik ikiuiniarnitsinni ullaaralaakkut aallarnissamik nutaamik ikkussinermik tunngaveqarpoq. Ajoraluartumik Mittarfeqarfinni sulisoq piffissaq sioqqullugu nalunaarfiginissaa iluatsinngitsoorsimavoq, taamaalillunilu qulimiguullip tikinnerani sulisoqarsimanani. Tamanna soorunami ajuusaarutigigaarparput, sapinngisarpullu tamaat atorlugu taamatut pisoqaqqittoqannginnissaa sulissutigissavarput. Erseqqissaassutigissavarpulli tamanna pisoq ataasiaannarluni pisimammat, ulluinnarnilu ilaasut sullinneqarsinnaannginnerinut tunngassuseqarani, angallatsitsivimmi pisortaaninngorlaaq nassuiaateqarpoq.

Taarsiisussaatitaanngitsut

Taanna paasissutissiivoq, Disko Lineni maajip 15-iat aallarnerfigalugu aasaanerani angallatinik angallassineq aallarnissagatsigu, naatsorsuutigilluinnarparpullu aallanngittoortarnerit annikilligaatsiassasut, naak aamma aasakkut silarlussinnaasaraluartoq – sunaluunniit angallatigalugu.

Kristian Jeremiassenip aamma suliffissaraluanik aannaasaqarneq pissutigalugu taarsiissamaarnersoq.

- Naamik Disko Line ajoraluartumik kinguaattoortoqartillugu taarsiisussaatitaanngilaq, angallassinermi isumaqatigiissut malillugu inissiinissat, nerisaqartitsinissat, kiisalu angalanissanik allannguinerit eqqaassanngikkaanni, Finn Hansen oqarpoq.