sprogkrav
Demokraatit Olsvigimut: Mimi Karlsen inissinneqarli
Ilisimatusarfimmi rektorinngortussap kalaallisut oqaaseqarnissaanut apeqqummut tunngatillugu, Sara Olsvigip IA-mi siulittaasutut parteeqatini Mimi Karlsen inissittariaqarpaa.
Demokraatineersoq Justus Hansen taama isumaqarpoq, taanna Inatsisartunut ilaasortap Mimi Karlsenip rektoriusussap piginnaasaasa suusariaqarnerinut akuliunneranut naammagisimaarinninngilaq.
Rektorinngortussap kalaallisut oqaaseqarnissaanik piumasaqaateqartoqannginnera assut akueriuminaatsoq isumaqarluni, Mimi Karlsen marlunngornermi tusagassiuutinut nalunaaruteqarpoq.
Aamma atuaruk: Rektorimik nutaamik atorfinitsitsiniarnermut politikeri akuliuttoq
- Demokraatiniit tatigingaarparput, Ilisimatusarfiup siulittaasuisa pikkorissuuneri, taakkulu nunap ilinniagaqartullu pitsaanerpaamik inissisimanissaat sulissutigaat, tatigingaarparpullu siulersuisut rektorimik, piukkunnarluartumik Ilisimatusarfimmillu pitsaanerpaamik ineriartortitsisinnaasumik, atorfinitsitsinissaartik sapinngikkaat, Justus Hansen tusagassiuutinut nalunaarummi allappoq, ilanngullugu oqarpoq:
- Inatsisartuni IA-p ilaasortaatitaata, Mimi Karlsen-ip taamaaqataanik tatiginngilaa, rektorinngortussap suut pikkoriffiginerai, taamaattumillu akuliunnissani toqqarsimallugu. Naammagineqarsinnaanngilluinnarpoq. Taamatut ittunut Mimi Karlsen naalakkersuinikkullu suliaqartut allat taamatut ittunut akulerutissanngilluinnarput.
Siulersuisut tamarmik isumaqatigiissutigigaat
Professor Minik Rosing, Ilisimatusarfimmi siulersuisunut siulittaasoq, siulersuisut tamarmik isumaqatigiillutik atorfimmut allagartaliussami oqaasertaq akuerisimagaat, ippassaq Sermitsiaq.AG-mut ilisimatitsivoq:
''Kalaallit oqaasiinik ilisimasaqarneq pitsaaquteqassaaq, kisianni piumasaqaataanngilaq.''
Aamma atuaruk: Rosing oqaatsinut piumasaqaat pillugu: Suliamut tulluartumik piginnaasalik pingaarnerpaavoq
''Sulianik taamaattunik suliaqartunik peqquteqartumik Ilisimatusarfik siulersuisoqartoq'', Justus Hansenip uparuarpaa.
''Pisortammi allat?''
- Inuiaqatigiit pisussaatitaapput IA-p politikkia ilisimassallugu, naalakkersuinermik suliallit ilanngussinnaatitaanerinik, kiap Ilisimatusarfimmi rektoritut atorfinitsinneqarsinnaaneranik. Inuiaqatigiit aamma pisussaatitaapput ilisimassallugu ilumut Ilisimatusarfik kisimi pineqarnersoq imaluunniit aamma allat pineqarnersut. Assersuutigalugu naalakkersuinermi suliallit kiap Royal Greenlandimi pisortaasuunissaanik akulerutissappat? Imaluunniit Telep? Imaluunniit suliffeqarfiit allat?, Justus Hansen Inatsisartunut ilaasortaq aperivoq.
- Inuiaqatigiit pisinnaatitaapput IA-p siutittaasuanit Sara Olsvigimit erseqqissumik paasitinneqarnissaminnut. Sulisunik atorfinititsitsisarnermut naalakkersuinikkut suliallit akulerunnissaat IA-p polikkerileriataarsimanerpaa?, Justus Hansen aperivoq.
Aamma atuaruk: Atorfimmut allagartaliussaq