unammilleqatigiinneq
Banknordikip Kalaallit Nunaat ukkatarinerulerpaa
Aningaaseriviup niuernera suli nunarsuarmi qeqertat annersaanni milliartorpoq
Kalaallit Nunaanni aningaaserivimmik ingerlatsinermut tunngatillugu, Banknordik ajortumut ingerlavoq. Tamanna aningaaseriviup ukiup qaammataani qulingiluani siullerni naatsorsuutaani takuneqarsinnaavoq.
Banknordikip 674 millionit koruuninik atortitsisimavoq, tamannalu 31 millionit koruuninik siorna piffissap taamak ilineranut sanilliullugu appariarneruvoq.
Atuaruk: Banknordikip Nunatsinni aningaasarsiornera appariartorpoq
Sinneqartoorut appasinneq
Kalaallit Nunaanni Banknordik ukiup qaammataani qulingiluani siullerni akileraarneq pitinnagu 7 millionit koruuninik sinneqartooruteqarpoq. Taamaalilluni sinneqartoorut ukiumut siulianut piffissami taama ilineranut sanilliullugu 3 millionit koruuninik annikinneruvoq.
Ingerlatsinermut isertitat katillugit 34 millionit koruuniupput, siornamut sanilliullugu millionit koruuninik ataatsimik appasinneruvoq, aningaaseriviup Nunatsinni ingerlanneqarneranut aningaasartuutit 20 millionit koruuniuppu, tamannalu aamma siornamut sanilliullugu millionit koruuninik ataatsimik ikinnerupput.
Kalaallit Nunaat pingaartillugu
Aningaaseriviup siulersuisuini siulittaasoq, Stine Bosse, naatsorsuutit saqqummiunneqarneranut atatillugu Kalaallit Nunaanni aningaaserivimmik ingerlatsineq annerusumik ukkatarineqalernissaa oqariartuutigaa.
- Nunani avannarlereni immikkoortortaq annerusumik isiginiarnerulerparput, tassani atuisunut privatinut aamma suliffeqarfinnut niuernermi annertusinissamut periarfissaqartoq isumaqarpugut. Kalaallit Nunaanni iliuuseqarnitta annertusarneratigut kalaallit niuerneranni unammilleqatigiinnermut qulakkeereqataassaagut nunaqartunut iluaqutaasussamik, Stine Bosse naatsorsuutit nalunaarutiginerini erseqqissaavoq.
Sinneqartoorut annikinnerusoq
Suliffeqarfissuup Banknordikip ataatsimut isigalugu piffissami akileraarneq pitinnagu 115 millionit anguai, tamanna siorna piffissap taama ilineranut sanilliukkaanni 19 millionit koruuninik appasinneruvoq.
Erniat appasinnerat ilaatigut isertitanut appasinnerutitsivoq.
Illuatungaanilli aningaasaateqarfik immikkut ingerlatsinermut tunngatillugu siuariaateqarpoq. Ukioq manna qaammatini qulingiluani siullerni 157 millionit koruuniuvoq, tamannalu 41 millionit koruuninik siornamut sanilliullugu qaffariarneruvoq.
Atuaruk: Banknordikip ukiuni qulini pisortaa tunuarpoq