Sisimiut
Assit takukkit: Aajuna pisiniarfimmi ujajaasoq
Sisimiuni Brugseneeqqami Kussangasumi ujajaasup, maannamullu suli ujarneqartup, assingi politiit maanna avammut saqqummiuppaat
Sisimiuni politiit Brugseneeqqami Kussangasumi sisamanngornermi sapaatip akunnerani kingullermi unnuap qeqqalernerani aningaasanik 17.000 koruunit missaanik ujajaasup assingi maanna avammut saqqummiuppaat.
Ujajaasoqarnerani misissuinerit kinguneqanngereersullu Sisimiuni politiit ujajaasumut sioraasaarutigaat ujaajaasup assingi tusagassiuutitigut avammut saqqummiunneqarumaartut, ujajaasoq nammineerluni imminut tunniutinngippat.
Maannalu tassa politiit ujajaasup assingi avammut saqqummiunniarlugit aalajangersimapput.
Atuaruk: Sisimiuni politiit ujajaasup assinga saqqummiunniarlugu siorasaaripput
Atuaruk: Pisiniarfimmi sulisut ujajaasoqareernerani ikiorneqarput
Ujajaasoq ima isikkoqarpoq
Ujajaasoq ima isikkulittut nassuiarneqarpoq: angut, 175 centimeterit missaannik angissusilik, nukeqarluartoq, qorsorpaluttunik isilik, aappaluttumik maskilik, qernertumik kavaajalik, qasertunik Nikenik joggingilik qernertunillu Nikenik kamippalik. Aamma sisimiorpalulluni oqaluppoq.
Kalaallit Nunaanni Brugsenimit nalunaarutigineqartut naapertorlugit ujajaasup pisiniartitsisut pingasut siorasaarsimavai, ineeqqamullu mattullugit.
Sisimiuni politiit sisamanngormat nalunaaqutaq 23.52 nalunaarfigineqarsimarput. Tillinniaq isertarfikkut tunorlikkut isersimavoq, sulisullu siorasaarlugit aningaasaasivissuaq ammartissimallugu.
Politiit ujajaanermut takunnissimasussarsiorput, imaluunniit ujajaasoqarneranut atatillugu ilisimasallit politiinut saaffiginneqquneqarput. Sisimiuni politiit oqarasuaataat 70 13 22-mik normoqarpoq.
Atuaruk: Sisimiuni pisiniarfimmi ujajaasoqareersoq politiit takunnissimasussarsiorput
Ujajaasup assingi allaaserisap ataani takukkit