Pisiniarfimmi sulisut ujajaasoqareernerani ikiorneqarput

Sisimiuni Bolethep Aqqutaani Brugseneeraq Kussangasumi angut 17.000 koruuninik ujajaavoq sisamanngornermi unnuap qeqqalersorlu.

Kalaallit Nunaanni Brugsenimit nalunaarutigineqarpoq ujajaanerup nalaani sulisut pingasut qunusaarneqarlutik ineeqqamut parnaarunneqarsimasut.

- Ujajaasoqareernerata kinguninngua pisiniarfiup pisortaa pisiniarfimmut apuuppoq, taamatuttaarlu politiit. Pisoq sakkortungaluaqisoq sulisut ajunngillat, politiiniillu apersorneqareeramik angerlartitaapput, pisortaq Susanne Christensen oqarpoq.

Imalu nangippoq:

- Brugseneeraq Kussangasumi sulisut tamarmik tallimanngornermi ualikkkut ataatsimiitinneqassapput, ataatsimiinissamullu tunngatillugu tarnip pissusaanik ilisimasalik aggersarneqarsimavoq, sulisut oqaloqatiginninnissamut pisariaqartitsissappata.

Atuaruk: Sisimiuni pisiniarfimmi ujajaasoqareersoq politiit takunnissimasussarsiorput

Sisimiuni politiit takunnissasimasunik ujartuipput
Ujajaasoqarneranik politiit nalunaarfigineqarput sisamanngornermi nalunaaqutaq 23.52, ilisimatitsippullu ujajaasoq sulisut isertarfiatigut isersimasoq tassanilu pisiniarfiup aningaasanik toqqorsivia ammaqqusimallugu.

- Pisoq sakkortuvoq neriuppugullu taamatut pisoqaqqissanngitsoq, Susanne Christensen oqarpoq.

Sisimiuni Brugsenit januarimiilli arfinileriarlutik tillinniarfigitipput ataasiarlunilu ajajaasoqarluni.

Ujajaasoq ima isikkulittut nassuiarneqarpoq: angut, 175 centimeterit missaannik angissusilik, nukeqarluartoq, qorsorpaluttunik isilik, aappaluttumik maskilik, qernertumik kavaajalik, qasertunik Nikenik joggingilik qenertunillu Nikenik kamippalik. Aamma Sisimiormiutut sumiorpaluuteqarpoq.

Taamaammat Sisimiuni politiit takunnissimasussarsiorput, imaluunniit ujajaasoqarneranut atatillugu ilisimasallit politiinut saaffiginneqquneqarput. Sisimiuni politiit oqarasuaataat ima normoqarpoq: 70 13 22.