Arctic Winter Games
Asii AWG-mit bloggerpoq: Biatlon 2016-imi aallutissavarput
Borgmester Asii Chemnitz Narup Arctic Winter Games-imit bloggerpoq. Aana ilanngussaasa sisamaat
2016-imi Nuummi Arctic Winter Gameseqarnissaanut aallartisaassutigalugu Kommuneqarfik Sermersuumi borgmesteri Asii Chemnitz Narup, Inuit Ataqatigiit, maannakkut Arctic Winter Gamesimi Alaskami illoqarfimmi Fairbanks-imiinnerani bloggertaassaaq - bloggip sisamassaa aana:
Meeraallungali pikkorissunik ujakkaartartoqarnerput tusaamaneqaatigaarput – aammalu ullumikkut suli pikkorissut amerliartorput. Tamanna ippassaq ujakkaarlutik siullermeerlutik unammimmata uppernarsivara. Niviarsiaqqat nukappiaqqallu ujakkaarlutik arpattartut pikkoripput aallussilluarlutillu, illerngit pitsaasut atuarlugit orpiit orpiliassallu akornisigut ingerlaarput. Pikkorissortatta ineriartornissaat anguniarlugit, timersuutip attatiinnarsimaneranut sungiusaasut qujaffigaakka. Sanioqqukkaangamik sisoraatinik arpanneq ajornanngitsutut isikkoqartittarppaat, soorlu aputikkut qitiinnartut, timersuutaavorli sakkortooq. Kalaallit pikkoreqaasi !!
Arctic Winter Games 2016-imi Nuummi biathlonimik unammiuaarneq ingerlanneqartussaavoq. Tamanna Arctic Winter Games International Commiteaniit piumasaqaatigineqarpoq ingerlanneqartariaqartoq. Taamaattumik biathlonimik unammisarfik tamarmiulluta alakkarparput, niviarsiaqqat nukappiaqqallu aallartimmata unammineri isiginnaarpavut aammalu ujaminnatsinneqartut takullugit. Inuusuttunut biathlonimik sungiusaasut arlallit oqaloqatigaakka. Timersuutaavoq immikkuullarissoq, ujakkaarluni arpaatigaluni igeriartartussaagamik, ataasiakkaarluni imaluunniit ataatsimoorluni ingerlanneqartarluni. Inuusuttagut ataasiakkaat biathlonimik unammeqataapput, taamaattumik timersuummut tunngatillugu ilisimasaqarnerulluta attavissaqarnerullutalu angerlarumaarpugut. Matumani nukiit pitsaasumik atorneqassapput, Nunatsinni annertuumik misilittagaqartunik peqalereerpugut.
Silageqaaq – seqinnarissuarmi allaaqqissuarmi timersortartuutivut illersorlugit nilliavugut pinngortitamilu taamatut sulinerput ataqqinaatitut misigalugu.
Arctic Winter Games tassaavoq timersornikkut unammineq aammalu kulturikkut paarlaasseqatigiinneq. Uju, Martha uangalu tamatta kulturimut tunngasunik paasisaqarluarnissarput pisariaqartissimavarput qilaatersorlutillu tusarnaariarlugit. Ataatsimooqatigiinni angutit tallimat Yellowknife-imi indianerinik siulillit, kulturikkut illorsuarmi tusarnaartitsisut isiginnaariarpavut. Nalunaaquttap akunnera ataaseq q ilaatersorlutik pipput, tamatumalu kingorna anersaarsiorpalaartumik qilaatersorlutik, uummatikkut eqqortinnartumik, tassanngaanniit tarnikkut eqqissisimasutut misigeqaluta anivugut.
Timersornermik unammineq kulturikkullu pisoqarfiusoq, inuttut isumaqarpunga nuannerlunilu tulluartuusoq.
Asii AWG-mit bloggerpoq: AWG 2016 Kalaallit Nunaanniissaaq, qilanaarpugut
Asii AWG-mit bloggerpoq: Tamatta nuannisarpugut
Asii AWG-mit bloggerpoq: Angajoqqaanut qujanaq