Arctic Winter Games
Asii AWG-mit bloggerpoq: Angajoqqaanut qujanaq
Borgmester Asii Chemnitz Narup Arctic Winter Games-imit bloggerpoq. Aana ilanngussaa pingajuat
2016-imi Nuummi Arctic Winter Gameseqarnissaanut aallartisaassutigalugu Kommuneqarfik Sermersuumi borgmesteri Asii Chemnitz Narup, Inuit Ataqatigiit, maannakkut Arctic Winter Gamesimi Alaskami illoqarfimmi Fairbanks-imiinnerani bloggertaassaaq - bloggip pingajussaa aana:
Ullumikkut aamma seqinnarilluni issilluni allaaqqissoq – siullermik volleyballimik nukappiaqqat inuusuttagut Yukonimut unammimmata, Uju aamma Martha peqatigalugit isiginnaarpugut. Kingusinnerusukkut Kalaallit Nunaat Alaskalu illup iluani isikkamik arsaattut isiginnaariarpagut. Unammisartuutigut holdit marluk tamarmik arsarluaqaat, pingaartumik niviarsiaqqat naligiillutik unammipput. Naak unamminerit tamaasa ajorsaraluartugut, inuusuttatta unamminerat qanimut malinnaavigalugit misigisaq angisuujuvoq.
Sumiiffinni arlalinni sermimik assigiinngitsunik ilusilersukkat angissusaalu assigiinngitsut takuneqarsinnaapput. Tassa aamma maaniippugut, Arctic Winter Games 2016-imi ingerlatilerutsigu pitsaasunik isumassarsiorniarluta. Isumassarsiat pitsaasut tamaasa allattoqqissaarpagut, ullullu tamaasa paasisanik isumassarsiorfinnillu pissarsisarpugut.
Sapaatiummat pisoq pingaarneq tassaavoq, Carlson Centerimi ammaanersiorneq, taannalu ulluinnarni sukuutsertartut stadionerivaat. Nal. 19 tikikkaalu, stadionimi isiginnaariat 1.000-ilippassuit najuupput. Timersortartut sungiusaasuilu katillugit 1935-it isaanerat isiginnaarlugit alutornarlutillu tupinnarput. Inuillu qiimammata. Aamma angajoqqaat sinnerlugit peqataallunga misigaara. Angajoqqaat qujaffigerusuppakka meeqqassi inuusuttut timersornissaannut nunanullu allanut angalanissaannut kaammattuinissinnut. Tamanna siunissamut aningaasaliineruvoq pitsaavoq.