kreditkortimut suliaq
Aleqa Hammond Siumumit peersitaavoq
Siumup siulersuisuunerisa Folketingimi ilaasortap kreditkortimik atornerluinera pissutigalugu ilaasortaajunnaarsippaat. Attaviitsutut ingerlaqqissaaq
Siumup Folketingimut ilaasortaatitaanut Aleqa Hammondip Folketingip kreditkortianik imminut pisiniunneranut tunngasumut suliaq marlunngornermi sangoriasaarpoq.
Partiip siulersuisuunerisa ulloqeqqareernerata kingorna ataatsimeereerlutik Aleqa Hammond ilaasortaajunnaartinneqassasoq aalajangerpaat, taanna folketingimut ilaasortaanerup saniatigut partiimi Naalakkersuisunilu siulittaasuusimavoq.
Atuaruk: Siumut Aleqa pillugu suliamut akuersaanngilaq
Atuaruk: Siumup Inuusuttaasa Hammond isornartorsioraat
Suliaq asuliinnaanngitsoq
- Ilaasortaajunnaarsitsineq kreditkortimik atornerluinermut suliamut tunngavoq. Siulersuisuunerit suliaq asuliinnaanngitsutut isigaat, partiip allattaa Mikael Petersen Sermitsiaq.AG-mut nassuiaavoq, saniatigullu ilisimatitsissutigaa isumaqatigiilluni tamanna aalajangiinerusoq.
Aleqa Hammond sapaatip-akunnerata naanerani politikkikkut assoralisimaarnerujussuarmut nutaamut pivoq, taanna ataatsimiinnernut tunngatillugu timmisartunut bilitsinut taxanullu korti kisimi atorneqarsinnaasoq atorlugu 12.900 koruunit nalinganut pisiniarsimasoq, Ekstra Bladetip tassani saqqummiuppaa.
Akuersaarneqanngitsoq
Folketingimut ilaasortap suliaq ajusaarutigalugu nalunaarpoq, kisianni nammineq akiliutini peqquserluffigineqarsimammat ajornartoornermi atorsimallugu taassuma naqissuserpaa.
Partiip siulittaasuata Kim Kielsenip tusagassiuutinut nalunaaruteqarnikkut ilisimatitsissutigaa, taamatut nassuiaateqarneq siulersuisuunerit akuersaanngikkaat.
- Taamatut pisoqarnera Siumup Siulersuisuunerisa isumaqatigiittut akuersaarneqarsinnaanngilluinnartutut isumaqarfigaat, taamatuttaarlu Aleqa Hammondimut tunngassuteqartut uteqqiattumik takkuttartut partiip tatigineqarneranik annertuumik innarliisutut nalilerparput. Tamatumani aningaasat annertussusaat pineqanngillat – uteqqiattumilli Aleqa Hammondip aningaasaqarnermik ingerlatseriaaseqarnerata ajornartorsiutaanera pineqarpoq, partiip siulittaasua Kim Kielsen naqissusiivoq.
Atuaruk: Aleqa Hammond: Ajornartoornermi korti atorpara
Atuaruk: Hammond: Isornartorsiorneqarnera paasilluarsinnaavara
Tunuaqquneqartoq
Siulersuisuunerit peersitsinerup saniatigut aamma Aleqa Hammond Folketingimi ilaasortatut tunuarniuteqaqqullugu kaammattorpaat, taamaalilluni sinniisoq siulleq, Jens-Erik Kirkegaard, suliamik nangitsiniassammat.
Tamannali pinavianngitsoq maanna paasinarsereerpoq.
Attaviitsoq
Aleqa Hammond Folketingimi attaviitsutut ingerlaqqilluni Facebookimi quppernermini ilisimatitsivoq.
Sinniisoq siulleq folketingimut juunimi 2015-imi qinersinermi 1.467-inik taaguunneqarpoq, Aleqa Hammondilu 3.759-inik taaguunneqarluni.