Nassuiaavoq
Aleqa Hammond: Ajornartoornermi korti atorpara
Folketingimi ilaasortap Facebookimini nassuiarpaa sooq korti atorsimanerlugu. Folketingip malittarisassai malillugit korti angalanernut, taxanut ataatsimiinnernullu atorneqartussaagaluarpoq
Naalakkersuisunut siulittaasuusimasoq kiisalu folketingimi maannakkut ilaasortaasoq Aleqa Hammond (S) folketingimit kreditkorti atorlugu 13.000 koruuninik atuisimasoq danskit aviisiata Ekstra Bladep sapaammi allaaseraa.
Sooq korti atorsimanerlugu Facebookimini nassuiaassutigaa.
Ajornartoortoqarnerani korti atoraa
- Juunimi kortikka itunes aqqutigalugu annertuumik atornerlunneqarsimapput qujanartumik bankima paasisaanik sukkasuumillu iliuuseqarfigisaanik. Matuneqartariaqarlutik nutaanillu qinnuttariaqarlunga.
- Folketingimiit mastercardeqartinneqarpunga aallaqqaataaniilli kisiannili atunngisaannarsimasannik, ajornartoornermi atortariaqarakku allaffeqarfik ilisimatippara paaseqatigiipugullu pisoq pillugu, Aleqa Hammond allappoq.
Atornerluinissamik siunertaqanngitsoq
- Ajoraluartumik allaffeqarfimmiit allaqatigiinnerput kukkusumik susassaqangitsumut kopeerneqarsimapput taassumalu ekstrabladet tusagassiortuinut ingerlateqqissimavaa. Uannit allaffeqarfimiillu ajuusaarutigineqaqisumik. Ajortussarsiornermik atornerluiniarnermillu siunertaqanngisaannarpoq kisiannili tusagassiortut mamarissaqigaat nalunngilara, Folketingimi ilaasortaq allappoq.