Folketinget
Akileraartarnermut ministerip "kalaallimik pisinermik" oqaaseqarnera Vestrep ajuusaarutigaa
Tatigeqatigiilluni suleqatigiilluarneq ingerlaqqissasoq Vestrep kissaatigaa
Folketingimi Venstret gruppiani siulittaasoq Søren Gade akileraarnermut ministerip Karsten Lauritzenip (V) Aleqa Hammond pillugu oqaaserisimasai Venstret sinnerlugit ajuusaarutigai. KNR taama allaaserisaqarpoq.
Ministerip ukiortaami ilassinninnermi "kalaallimik pisisimanerarluni" oqaaseqarnera, tassa Aleqa Hammondi Kalaallit Nunaat pillugu ataatsimiititaliami siulittaasunngortinneratigut isumaqatigiissut pillugu isummernera pineqarpoq.
Atuaruk: Qallunaat naalakkersuisui 'kalaallimik pisisut'
Karsten Lauritzenip taama oqaaseqarsimanera isornartorsiorneqangaatsiarpoq.
Maannalu Venstrep gruppiani siulittaasoq utoqqatsertunut ilannguppoq.
- Aleqa Hammond kalaallit allalluunniit taama eqqartorneqarnerat kusananngilaq, Søren Gade KNR-imut taama allagaqarpoq.
- Ilisimavara oqaatigisimasani pillugit Karsten Lauritzen aamma ajuusaartoq, Aleqa Hammondilu naapereerpaa utoqqatserfigereerlugulu. Neriuppugut maanna tatigeqatigiilluta suleqatigiilluarnerput Aleqa Hammondilu siunniukkumaaripput, Søren Gade allappoq.
Kalaaleq Aleqa Hammond pisortat aningaasaataannik arlaleriarluni atornerluinikuuvoq.
2013-imi apriilip qaammataani Naalakkersuisut siulittaasuattut qinerneqarpoq 2014-imili septembarimi tunuartariaqarsimalluni. Pisortat aningaasaataannik 100.000 koruunit sinnerlugit atuisimanera paasineqarmat Naalakkersuisut siulitaasuattut tunuartarialersimaneranut pissutaasimalluni.
Atuaruk: Akileraartarnermut ministerip oqaaseqarnini utoqqatsissutigaa
Siorna augustip qaammataani Aleqa Hammond folketingip aningaasaataanik atornerluisimasoq paasineqarmat partii Siumumit anisitaavoq.
Akileraarnermullu ministerip "kalaallimik pisisimanerarluni" oqarneranut DR Nyhedernut ima oqarpoq:
- Oqarsinnaavunga taama oqaluttarmat. Uagut kalaallit pilluta taama oqaluttarpoq. Tamaattumik pisineq.
- Danskit oqaasii inunnguuseralugit oqaaserinngikkaluarlugit isumaqarpunga taassumunnga naleqqiullunga danskisut atugartuunerusutut oqalussinnaallunga, qungujulluni oqarpoq.
/ritzau/