Borgmesteri: Utoqqaat illuat isumannanngilaq
Aasianni utoqqaat illuanni sulinermi atugassartitaasut ernumanarput ukiullu pingasut ingerlaneranni iliuuseqarfigineqaratik, taama Peqqissaasut Kattuffiat isumaqarpoq. Taakku ilaasortatik sinnerlutik ernumalluni allakkiamik Kommune Qeqertalimmut allagaqarput. Utoqqaat illuat ernumananngitsoq, sulisutigullu aaqqiisoqarsimasoq, Kommune Qeqertalimmi borgmesteri eqqissisaavoq.
Annonse
Aasianni utoqqaat illuanni sulisut sakkortuumik tarnikkut sunnerteqqapput, uippakajaarnermillu eqqugaaqqallutik. Ilaatigut sininnaveerneq, eqqarsaatit nuanniitsut nikallunganerillu aqqusaarneqarlutik.
Taama Peqqissaasut Kattuffiat ilaatigut ernumalluni allagaqaammik Kommune Qeqertalimmut allagaqarput. Peqqissaasut Kattuffiat ilaasortami sulinermi atukkatigut, sulianullu sunniuteqarneranut, najugaqartunullu isumaginninniarnerannut sunniuteqarsinnaanera ernummatigaa.
Isumannanngilaq
Isumannanngilaq, taama Kommune Qeqertalimmi borgmesteri Ane Hansen (IA) isumaqarpoq. Ajornartorsiutimmi aaqqiiviginiarlugit iliuuseqartoqarsimasoq taassuma oqaatigaa:
- Utoqqaat illuat Aasianniittoq isumannanngilaq sulisutigut aaqqiisoqarnikuugami. Aap iliuseqartoqarpoq, maanna suliaqartitsivungut akissuteqaammik taannalu kommunalbestyrelsimut saqqummiunnissaa siunertaralugu suliarineqarpoq.
Sulisutigut qanoq aaqqiisoqarsimanersoq Sermitsiap Ane Hansen aperaa, apeqqulli akissuteqarfiginiarlugu uterfiginngilaa.
Borgmesteri suli akissuteqaqqinngilaq, naqissuserpaali akissummik akissuteqarniarlutik eqqartuussisuserisumik suleqateqarlutik.
- Naatsorsuutigaara 12-14 april missaani suliaq akissutissaalu saqqummiuteriannanngorsimassasoq, nangillunilu:
- Aamma ataavartumik aaqqissuussineq ingerlavoq. Personale sagiummat ammasumik oqaaseqarfiginissaa mianeralugulu tunuarsimarfigaara saqqummiussassarput kommunalbestyrelsimut saqqummiutereerukku nassiussinnaavara.
