Aasianni utoqqaat illuanni sulisut suliassaqarpallaartut

- Tarnimut annertuumik nanertuisutut tamanna ilaasortanit misigineqarpoq, sulisullu arlallit ilungersuanermik/stress ilaatigut sinissaaleqinermik, nuanninngitsunik eqqarsaateqarnermik tujorminermillu kingunilimmik ajornartorsiuteqarput.

Taama Peqqissaasut Kattuffiat eqqartuussisuserisunik suleqateqarlutik Kommune Qeqertalimmut ilaatigut allagaqarput. Peqqissaasut Kattuffiata ilaasortami suliffimmi atugaatigut ernummassuteqarpoq, tassani sulinerannut najugaqartunullu ikortarialinnut sunniuteqarsinnaanissaa ernummatigalugu.

Ernumassut nutaajunngitsoq

Ernumanermik allagaqaat Sermitsiap pissarsiaraa. Tassani allaqqavoq ernumassut nutaajunngitsoq, utoqqaat illuannimi atugassarititaasut 2020-imili suaartaartigineqalerput.

Arlaleriarluni saaffiginnittarsimagaluarnerit kinguneqarsimanngitsut allagaqaammi allassimavoq. Saaffiginninnerillu ima isikkoqarput:

Kommune Qeqertalik 2020-imi paasitinneqarpoq Utoqqaat illuanni ukiuni arlaqartuni arlaleriarluni sundhedsassistentinik peqqissaanermilu ikiortinik ilinniarsimasunik sulisussarsiortoqartaraluartoq, atorfiit inuttassarsineqartannginnerat sulisoqarniarnikkullu pissutsit isornaateqarnerat tassani aamma maluginiaqquneqarpoq.

Sulinermi ajornartorsiutit annertuut pillugit iluarsiisoqarnissaa anguniarlugu kommunimi pisortaaneq 2021-imi ataatsimeeqatigiumaneqarpoq, Peqqissaasut Kaffuffiat naapertorlugu ataatsimiittoqarsimanngilaq.

Kommune Qeqertalimmut 2022-imi maluginiaqquneqarpoq utoqqaat illuanni sulisunik amigaateqartoqartoq, tassani peqqissaanermi ikiortit ilinniarsimasut amigaatigineqarlutik. Kommunimi pisortaaneq ataatsimeeqatiserineqarpoq, ataatsimiinnerli pinngilaq.

- Allaffissornikkut suliassanik ilaatigut atorfimmi akisussaaffinnut nassuiaasiornissanut atorfininnermullu atatillugu isumaqatigiissusiornissanut, aatsaat kingusinnerusukkut sulisoqarnermut immikkoortortamut killilimmik ikiorserneqarluni tiguneqartunut, isumaginninnissamik, kommunip piumasataataasa annertusiartuinnarnerat pissutigalugu, allaffimiutut overassistentitut atorfik fuldmægtigitut atorfimmut qaffanniarlugu, juni qaammat DIKP-mi ilaasortat KQ-mut saaffiginnipput.

- Atorfiup allanngortinneqarnissaata siunertara ilaasortat suliassamik qiterisaannut piffissaminnik atuisinnaanissaat, ilaatigut taama ernumassuteqarluni allagaqaammi allassimavoq.

2023-imi februaari qaammat qiteqquttoq overassistentitut atorfiup fuldmægtigitut atorfimmut allanngortinneqarnissaanut 2022-imi qinnuteqaataasumut akissutissaq nukingisaarutigineqarpoq. 

Februaari qaammat naasoq apeqquteqaat kommunaldirektørimut illoqarfimmilu pisortamut nukingisaarutigeqqinneqarpoq.

Sulisut suliassarpassuartigut ilungersortitaanerat pillugu 2023-imi decembarip ulluisa 28-ianni kommuni attavigineqarpoq.

- Sulisut isumaat naapertorlugu maanna suliffimminni atukkat - ilaatigut ingerlatsinermi aqutsinermilu suliassat akuleriit annertuut pissusissamisuunngillat, ilaasortallu piffissaannut peqqissusaannut najugaqartullu pisariaqartitaannut sunniuteqartumik annertuumik ilungersortitsillutik, ernumanerli allagaqaammi allassimavoq.

Pimoorunneqartariaqarput

Aqutsisuniit ilaasortanut ikorfartuisoqaranilu allatigulluunniit tapersersuisoqanngitsoq, Peqqissaasut Kattuffiat naliliivoq. Taakkua naapertorlugit Kommune Qeqertalimmi aqutsisut aqutsisutut akisussaaffimminnik eqquutsitsinnginnerat maanna kingunerluuteqalereersoq.

- Taamaammat allagaqarpugut neriulluta qulaani pineqartut pimoorunneqassasut, peqatigiillutalu sulisunut najugaqartunullu sullivimmi peqqinnartumik avatangiiseqarnerup pilerseqqinnissaanut aaqqiissuteqarsinnaassasugut.