Aasianni utoqqaat angerlarsimaffiat
Aqqa Samuelsen: Utoqqarnik marloriaammik sumiginnaaneq unitsilli
Aasianni utoqqaat angerlarsimaffianni sulisunut atugassarititaasut pillugit kommunalbestyrelsi ilisimatinneqartarsimanngitsoq, kommunalbestyrelsimi ilaasortaq Aqqa Samuelsen (S) isumaqarpoq. Taamaattumik Siumut gruppia piumasaqarpoq ernumassummik allakkiaq aallaavigalugu kommunalbestyrelsi immikkut ittumik ataatsimiittariaqartoq.
Annonse
Aasianni utoqqaat angerlarsimaffianni sulinermi atugassarititaasut pillugit ernumassuteqarluni Peqqissasut Kattuffiat Kommune Qeqertalimmut saaffiginnittarsimagaluarpoq.
Kattuffik naapertorlugu sulisut suliassaqarpallaarlutik tarnikkut peqqinnanngitsumik sunniuteqartoq, kiisalu sulisut arlallit uippalakaanermik eqqorneqartut.
Kommunalbestyrelsi ataavartumik ilisimatinneqartarsimannginnera kommunalbestyrelsimi ilaasortap, Aqqa Samuelsenip (S) sakkortuumik isornartorsiorpaa:
- Ataatsimiititaliaq Inuit aammalu kommunalbestyrelse Aasianni utoqqaat illuani sulinermi atugassarititaasut pillugit ingerlaavartumik paasissutissinneqartarsimanngimmata akuersaarneqarsinnaanngilaq.
Utoqqarnik sumiginnaaneq
Ernumassummi allagaqaammi atuarneqarsinnaasoq Peqqissaasut Kattuffiat arlaleriarluni Kommune Qeqertalimmut saaffiginnittarsimagaluartoq. Tassani utoqqaat angerlarsimaffiani sulinermi atugassarititaasut pillugit aaqqeeqartiginiarlugu saaffiginnittarsimallutik, tamannali iluatsissimanngitsoq Peqqissaasut Kattuffiata tikkuarpaa.
Tamanna marloriaammik sumiginnaanerusoq, Aqqa Samuelsen isumaqarpoq.
- Tamanna utoqqarnik marloriaammik sumiginnaanertut paasisariaqarpoq. Aamma ataatsimeeqatiserineqarnerit piviusunngortinneqartarsimanngimmata akuersaarneqarsinnaanngilaq.
Siumut gruppia Kommune Qeqertalimmi kommunalbestyrelsi immikkut ittumik ataatsimiisinneqarnissaanik piumasaqarpoq, Peqqissaasut Kattuffianniit saaffiginnissut aallaavigalugu.
