Wistoft: Mittarfinnik sanaartornissap akia isertuussaavoq

Naak Munck Gruppen neqeroortuni toqqarneqaraluartoq Nuummi Ilulissanilu mittarfinnik sanaartornissamut akiligassat isertuunneqassapput.

Peter Wistoft ilisimatitsivoq piumasaqaatit tallimat tunngavigalugit Nuummi Ilulissanilu mittarfinnik sanaartornissamik neqeroortunit toqqaasimasut.

Qullersaqarfimmi pisortaq Peter Wistoft, Kalaallit Airports, Munck Gruppen Nuummi Ilulissanilu mittarfinnik marlunnik sanaartornissaanut qanoq piumasaqarsimanersut ilisimatitsissutigerusunngilaa.

Tallimanngormat Kalaallit Airports ilisimatitsivoq neqeroortuniit Danmarkimeersoq Munck Gruppen qinigaasimasoq, tassani Hollandimi Canadamilu sanaartornermik isumaginnittut allat marluk neqeroorsimapput.

- Suli neqeroorut tigussaasoq isumaqatigiinniutigaarput, Peter Wistoft ilisimatitsivoq nassuiaallunilu mittarfinnik ingerlatseqatigiiffiup mittarfiliortitsinissamut nutaanik neqerooruteqassasut.

Katillugu akia

- Mittarfissat katillugit qanoq akeqassanersut nalunaarutigineqareermat akia ilisimatitsissutigerusunngilarput sanaartornermik isumaginnittut naatsorsuutigisinnaaniassammassuk aki sorleq sulissutigineripput, Peter Wistoft nassuiaavoq.

Neqeroortut pingasut nalilersorneqarnerinut piumasaqaatit tallimat tunngavigineqarsimasut ilisimatitsivoq.

Piumasaqaatit tallimat

- Suliniummut aki 60%-imik naleqqiussaavoq, Peter Wistoft ilisimatitsivoq.

Allat isiginiarlugit neqeroorutit uku tunngavigalugit nalilersorneqarsimapput:

  • 10 procenti: Suleriaaseq
  • 10 procenti: Siuliatigut suliap assiganik suliaqarnikuugaanni mittarfiillu sanaartornerup nalaani ingerlasimappata.
  • 10 procenti: Inunnik isumaginninneq eqqarsaatigineqarpoq.
  • 10 procenti: Kattuffik sulisullu.

- Aamma akit pillugit ilisimatitseqqusaanngilanga nipangiussimatitaanissaq pissutigalugu, qullersaqarfimmi pisortaq naqissusiivoq.

Aggustimi inaarutaasumik atsiorneq

Juulip naanerani aggustilluunniit aallartinnerani immikkuualuttut pillugit isumaqatigiissuteqartoqarsimanissaa naatsorsuutigaa. Pisortatigoortumillu aggustip qeqqani atsioqatigiittoqassaaq, Peter Wistoft ilisimatitsivoq.

Powered by Labrador CMS