Uppernarsaat: Mittarfiit pillugit isumaqatigiissut aajuna
Malittarisassat aamma danskit naalagaaffiata Kalaallit Airportsimi piginneqataaneranut isumaqatigiissutit naammassineqarput
Naalagaaffiup kalaallit mittarfiini tunniusimanissaat pillugu Lars Løkke Rasmussen aamma Kim Kielsen ullumi isumaqatigiissuteqarput.
Isumaqatigiissummi pingaarnerit Naalakkersuisut Inatsisartuni aningaasaqarnermut akileraartarnermullu ataatsimiititaliaq peqatigalugu misissussavaat. Tamatuma kingorna piginneqataassutit pillugit isumaqatigiissummut uppernarsaatit aamma malittareqqusat atsiorneqassapput.
Kim Kielsenip aamma Lars Løkke Rasmussenip isumaqatigiissummi ullumi atsiugaanni aajuku tigulaakkat:
- Inatsisartut Kalaallit Nunaanni mittarfinnik nutaanik sanaartornissaq il.il. inatsimmik atuutsitsilersitsinikuupput, inatsit Nuummi Ilulissanilu mittarfinnik nutaanik sanaartornissamut ingerlatsinissamullu Namminersorlutik Oqartussat naalagaaffiullu piginneqatigiinnissaannut suleqatigiinnissaannullu tunngaviussaaq.
- Mittarfiit nutaat pillugit Inatsisartut inatsisaata ilaatigut imaraa Kalaallit Airports International A/S-imi (KAIR International A/S) danskit naalagaaffiata 700 mio. kr.- nik nalilimmik piginneqataassutissanik pisiaqarnissaanut Naalakkersuisut piginnaatitsinissaat, KAIR International A/S Nuummi Ilulissanilu nunat tamalaat mittarfissaannik sanaartornermi ingerlatsinermilu Kalaallit Airports A/S-imut immikkoortortaqarfiussaaq kiisalu piginneqatigiiffimmi pineqartumi piginneqataanissamut piginnaatitaaffeqarneq pillugu piginnittussanut isumaqatigiissusiussalluni.
- Naalagaaffiup KAIR International A/S-imi piginneqataassutaa pillugu isumaqatigiissutip imassai danskit naalakkersuisuisa Naalakkersuisullu isumaqatiginninniutigalugit naammassisimavaat. Isumaqatigiissutigineqarput ingerlatseqatigiiffip nutaap ileqqoreqqusassai, ataatsimut piginneqatigiissutit aqunneqarnissaannik piginnittunut isumaqatigiissut kiisalu allagaatit tunngaviusut. Taamatuttaaq Kalaallit Airports A/S-ip naalagaaffiullu isumaqatigiissutigisimavaat naalagaaffiup taarsigassarsisitseqqissinnaanera aamma KAIR International A/S-ip avataanit taarsigassarsisitsisuanut naalagaaffiup qularnaveeqqusiissutissai.
- Aningaasaliissutissat piviusunngortinnissaat pillugit isumaqatigiissutinik atuutsitsilernissamut aamma Greenland Venturep Ineriartortitsinermullu Aningaasaateqarfiup inuussutissarsiornermut aningaasaateqarfissaannik katillugit 220 mio. kr.-nik nalilinnik pilersitsinissamut danskit naalakkersuisui Naalakkersuisullu piareersimapput.