Mittarfiit pillugit isumaqatigiissut naammassivoq
Nunatsinni mittarfinnut qallunaat aningaasaliinissaat pillugit isumaqatigiissut kiisami inissippoq.
Ministeriuneq aamma Naalakkersuisut Siulittaasuat Kalaallit Nunaanni mittarfiliassanut danskit suleqataanissaat pillugit septembarimi isumaqatigiissummut ilassutitut isumaqatigiissummik ullumikkut isumaqatigiissuteqarput.
Danskit naalagaaffiata Kalaallit Airportsimi piginneqataassutaasa sinaakkutaannik erseqqarinnerusumik isumaqatigiissummi allaaserineqarput.
Naalagaaffik Nuummi aamma Ilulissani mittarfinnut aningaasaliinissaa septembarimili isumaqatigiissutigineqarpoq, Qaqortoq pinnani. Danskit piginneqataassutaanni piumasaqaatit maanna illuatungeriit isumaqatigiissutigaat.
- Kalaallit Nunaanni nutaanik mittarfiliortiternikkut aamma namminersorlutik inuussutissarsiuteqartunik nukittorsakkamik suleqateqarnissat pillugit attaveqaatinik nutarterinernut naalagaaffiup peqataanissaanut tunngavissat anguleratsigit nuannaarutigaara, ministeriuneq Lars Løkke Rasmussen tusagassiuutinut nalunaarummi taama oqarpoq.
- Folketingimi partiit tamarmik suliniut tapersersormassuk nuannaarutigaara aamma kissaatigisap inuussutissarsiutinik suliffinnillu ineriartortitsinerni avitseqatigiissutiginissaa nuannaarutigaara.
Isumaqatigiissut maanna Inatsisartuni aningaasaqarnermut akileraartarnermut ataatsimiititaliamut saqqummiunneqassaaq. Tasanilu isumaqatigiissut akuerineqassappat, piginneqataassutsimut isumaqatigiissut danskit naalagaaffiallu atsioqatigiissutigineqassaaq.
- Ilassutitut isumaqatigiissut Inatsisartuit siorna septembarimi isumaqatigiissutaannut tiguneqartumut naapertuulluarpoq. Mittarfiit nutaat pillugit inatsimmi naalagaaffiup, maannakkut isumaqatigiissu-tigissallugu piareersimaffigisarput, aningaasaliinissaa pillugu isumaqatigiissut eqqarsaatigineqarpoq. Taamatuttaaq 2019-imut Aningaasat pillugit inatsimmi Inatsisartut namminersorlutik inuussutissarsiuteqartunik nukittorsakkamik suleqateqarnissat eqqarsaatigisimavaat, Naalakkersuisut siulittaasuat Kim Kielsen oqarpoq.
- Piffissami qanittumi Aningaasaqarnermut Akileraartarnermullu Ataatsimiititaliaq peqatigalugu mittarfiit pillugit ingerlatseqatigiiffim-mik nutaamik piginnittuuneq pillugu nassuiaanissaq, isumaqatigiissu-tit atsiorneqarniassammata, aamma suleqatigiilernissat qilanaaraakka.
- Mittarfiliassat atuisartunut iluanaarutaarujussuartussaapput aamma mittarfiliassanut naalagaaffiup peqataanerata mittarfinni nutaani aningaasaqarneq 1 mia. koruunit missaannik pitsanngoritissavaa. Tamanna ilutigalugu suiniummi ajutooriataarsinnaanerit anni-killissapput aamma suliniut patajaannerulissaaq. Tamannalu atuisartunut malunnartumik iluaqutaassaaq. Tamakkununnga inuussutissarsiutit ineriartortinneqarnissaannut 220 millioner koruuninik aningaasaliinissarput ilanngunneqassaaq. Tamakkulu Kalaallit Nunaanni inuussutissarsiutinut suliniutinut nutaanut soorunami iluaqutaassapput.