Ukaleq Slettemark VM-imi sisamaattut inissittoq
Sisorartartoq Ukaleq Slettemark Slovakiami nunarsuaq tamakkerlugu pissartanngorniunnermi ullumi sisamaattut inissippoq. Sisorartartup unamminermi angusani naammagisimaarpaa.
Kalaallit Nunaanni siullersaalluni nunarsiarmi pissartaasoq, 17-inik ukiulik Ukaleq Slettemark, sisorarnermi Biathlonimi malersuunnermi ullumi unamminermi Slovakiami ingerlanneqartumi, sukkanerit sisamaattut inissippoq.
Malersuulluni unamminermi sisorarfissaq 7,5 kilumiiterisut isorartussuseqarpoq, ingerlaarnermilu 20-riarluni ooqattaasarfissaqarluni. Ukaleq Slettemarkip ooqattaasarfissat marluk uniorpai.
Ajugaasumit 24 sekundinik kingulliulluni
Ukaleq Slettemark unamminermi apuuteqqaartut sisamaattut inissippoq, ajugaasumiillu, Amy Baserganimit Schweitzimeersumit, sekundinik 24-inik kingulliulluni apuulluni.
- Unammineq naammagisimaarluarpara, marloriarlunga unioraluarlunga. Ooqattaasarfimmi siullermi sungiusimasanniit allaanerusumik iliorpunga, tassanilu uniorlunga. Oqattaasarfissami pingajussaaniittumi naluara qanorpiaq iliornerlunga, tassanili aamma uniorpunga. Ataatsimulli isigalugu ingerlaarnera naammagisimaarluarpara, Ukaleq Slettemark Sermitsiaq.AG-mut oqaluttuarpoq.
Kalaallit Nunaata sisorallammaa ingerlaarnermini naammagisimaarinnilluarpoq, Norges Cupimilu, peqataaffigisamini, suli ajugaanissaminut isumalluarpoq.
- Unammeqatikka maani arlaqartut tassunga peqataapput, taakkulu aamma ingerlalluarput, Ukaleq Slettemark oqarpoq.
Kuultinnanneq
Ukaleq Slettemark Biathlonimi sapaatiummat kingullermik unamminermi 10 kilumiiterisut isorartutigisumi, sisamariarlunilu ooqattaasarfittaqartumi, nunarsuarmi pissartanngorpoq. Unamminermini 31 minutsit sekundillu 49-t atorpai, ooqattaasarnerminilu uniorani.
Tallimanngormat unamminermi allami peqataaqqippoq, tassani 6 kilumiiterisut isorartutigisumi, marloriarlunilu ooqattaasarfittalimmi, aallartilluarlunilu. Unamminermili ujaminnanngilaq, apuuttut arfernattut inissikkami, ajugaasumit Norgemeersumit Maren Bakkenimit 46,7 sekundinik kingulliulluni apuulluni.
Ooqattaasarnermi kingullermi uniorpoq, pillaatitullu sisorarfimmi kaajallaaqqittariaqarluni.
Norges Cup
Inuusuttut nunarsuarmi pissartanngorniunneranni unamminermi nalilersuinerit tamakkiisut takugaanni, takuneqarsinnaavoq Ukaleq Slettemark ooqattaasarnermi sukkanerit arfernattut inissittoq, sisorarnermi sukkanerit arfernattut inissittoq, kiisalu ooqattaasarfimmi piffissami sivikinnerpaami ooqattaasartartutut arfineq-aappaattut inissilluni.
Taamaammat Ukaleq Slettemark isumaqarpoq Norges Cuppimi ajugaanissaminut suli periarfissaqarluni.
- Neriuppunga ajugaassallunga. Suli piffissaqarpoq, Ukaleq Slettemark Sermitsiaq.AG-mut oqaluttuarpoq.
Norges Cup sapaatip akunnerini arlalinni ingerlanneqartarpoq, ajugaasullu paasinissaanut suli sapaatit akunneri naaneri pingasuullutik. Norges Cup, inuusuttut nunarsuarmi pissartanngorniunnermi unammeqataasut 60-iusut arlallit peqataaffigisaat, ukioq manna poorskertinnagu naammassissaaq.