Ukaleq Slettemark nunarsuarmi pissartanngorpoq
Ooqattaasarluni ujakkaartartoq nunarsuami pissartanngorniunnermi 10 kilometerinut arpannermi sisamariarluni iginnertalimmi siullermeerluni kuultinnappoq.
Ukaleq Slettemark inuusuttut nunarsuarmi pissartanngorniunneranni, sapaammi, Slovakietimi kuultinnaqqammerpoq. Ataasiakkaarluni 10 kilometerinut ooqattaasarluni arpannermi tamanna pivoq.
Angusat allattorsimaffianni atuarneqarsinnaavoq, Ukaleq Slettemark sisamariarluni igikkami tamaasa eqqorsimagai aamma piffissaq 31:49.3 atorlugu apuussimasoq. Tassa ajugaasup tullianit, Tereza Vobornikovamit, minutsimik ataasersuarmik sekundinillu 14-nik sukkanerluni.
Tamanna isorartussutsimi tassani Ukaleq Slettemarkimut pitsanngoriaat annertuvoq, tassami siorna 27-iulluni apuukkami.
Ukaleq Slettemarkip ukioq ujakkaarfiusoq aallartilluarpaa, Norge Cupimi januaarip aallartinnerani ajugaavoq aamma ajugaasup tulliattut inissippoq. Norge Cupimi angusat katinnerini aamma siuttuuvoq, Maren Bakkenimit aamma Synne Owrenimit siulliulluni.