- Uggornarluinnarpoq: Angut anniartupilussuaq namminneq angallattariaqaraat
Sapaatiummat angut qamuteralannik qaqqami ajutoormat, Erik Palo najuuppoq. Oqartussat suliarinninnerat taassuma qiimmatsaatiginngilaa – politiit pisortaata isornartorsiuineq inissaminiinnerarpaa. Peqqinnissaqarfik misissueqqissaarpoq.
Ajutoortoqartillugu kina akisussaasuua?
Erik Palo taama aperivoq, taanna sapaatiummat ualikkut angut Nuup kangiani qaqqami qamuteralalluni ajutoormat najuuppoq.
Annaassiniarneq politiit peqqinnissaqarfillu qanimut suleqatigalugit annaassiniarneq pisoq, Qamutit SAR Groupimut innersuussilluni tusagassiorfiup matumaa oqaluttuaraa. Kisianni ajorluinnartoqarpoq.
Erik Palo taama oqarpoq, taanna saqitsaannermik aallartitserusunnani naqissusiivoq. Kisianni oqarpoq:
- Saqqummiukkusuppara. Tassami una erseqqissartariaqarparput.
Ersarissumik nalunaaruteqartoqanngitsoq
Ajutoorneq nalunaaqutaq 16 missaani pivoq.
Kalaallit Nunaanni Politiit oqartussani siullertut attavigineqarput. Peqqinnissaqarfiup pisoq nalilersussagaa, politiit ilisimatitsipput. Peqqinnissaqarfik attaveqarfigineqartoq oqaatigineqarpoq, kisianni Erik Palop oqarnera naapertorlugu ersarissumik uterfiginnittoqanngilaq.
Akunnerit arlallit ingerlareermata qamuteralattut namminneq iliuuseqarniarlutik aalajangerput.
- Pisoq nuanninngilluinnarpoq. Anniartorujussuuvoq, qanorlu pisimanersoq ilisimanngilarput. Oqartussat tungaannit ersarissumik nalunaaruteqartoqanngilaq, Erik Palo oqarpoq.
Qamuteralattut ilaata ilisarisimasani qanittumi angallateqartoq attaveqarfigaa. Mianersorlutik ajutoorsimasoq sissamukaappaat, tassanilu angallammut ikineqarluni Nuummi talittarfiliaanneqarpoq, Sanamullu ingerlanneqarluni.
- Qitini napisimagaluarpagu eqqunngitsumik nuussimasinnaagaluarparput, taamaalilluni inuunermi sinnera nukillaarsinnaalluni, Erik Palo oqarpoq, taassuma ingerlanera nuannarinngilaa.
Nangippoq:
- Ajoquserneralu ingerlaannaq passunneqartariaqarsimanngimmat iluatsitsivugut, ullormilu tassani kiammat. Taamaanngippat ajorluinnartumik kinguneqassagaluarpoq.
- Uggornarluinnarpoq
Peqqinnissaqarfik sivisuallaamik nalornisimasoq, Erik Palo misigisimavoq. Iliuuseqartoqarsimanersoq ilisimanngilaa.
- Politiit peqqinnissaqarfiullu akornanni attaveqatigiinneq issiaviit marluk akornanni kipisoortarpasippoq, taamaalilluni iliuuseqartoqartanngilaq. Uggornarluinnarpoq, taanna oqarpoq.
Oqartussat pinartoqartillugu kigaappallaamik iliuuseqartarnerannik, qamuteralattartoqatigiit aatsaat misigisaqanngillat.
- Nunamiittartut amerlavugut. Imaassinnaavoq illit tulliani taamatut inissisimalertutit, sorpassuusinnaapput. Tamanna qulaajarneqarsinnaanerluni, Erik Palo aperivoq:
- Qaqqami ajutoortoqartillugu kikkut aperineqassanersut apeqquterujussuuvoq, qanorlu ikiorneqarsinnaanerluni naatsorsuuteqartoqassanersoq. Oqartussat periusaat aamma aalajangiisartut piginnaasaat paasisaqarfiginerussallugit soqutiginarsinnaavoq.
Naleqqutinngilaq
Susassaqartut tamarmik akornanni pitsaasumik oqaloqatigiittoqarnissaanik, taamaalillunilu pissutsit pitsanngorsarniarlugit kissaateqarluni saqqummerusulluni, Erik Palo oqaluttuarpoq.
Pisut assingusut politiit peqqinnissaqarfiullu akornanni oqartussat sorliit akisussaasuunerinut isumaqatigiinngissuteqartoqarnera pillugu, Sermitsiaq.AG qanittukkut nassuiarpaa, taamaattumillu innuttaasup isumannaatsumukaanneqarnissaa katsorsarneqarnissaalu akilerneqarnissaa.
Erik Palop paasinninnera ataatsimut isigalugu isumaqatigalugu, Kalaallit Nunaanni Politiit pisortaat, Bjørn Bay ilisimatitsivoq:
Innuttaasumut ikiorneqartariaqartumut ikiortissat suleqatigiinnermit aamma oqartussat marluk arlallilluunniit akornanni suliarineqartarnerannik kinguarsarneqartarnera naleqqutinngilaq – kinguaattoornermut pissutaasoq apeqqutaatinnagu, taanna isumaqarpoq.
- Uanga isumaga naapertorlugu innuttaasup ajornartorsiutigisussaanngilaa, politiit pisortaat Sermitsiaq.AG-mut allappoq.
Peqqinnissaqarfiup pisoq misissueqqissaarfigalugu ilisimatitsissutigaa, tamatumalu kingorna aatsaat oqaaseqarsinnaapput.