Peqqinnissaqarfik politiillu nakorsiartut angallanneqarnerinut akiligassaq isumaqatigiinngissutigigaat
Inuit napparsimasut imaluunniit ajoqusersimasut inoqarfiunngitsuniittut angallanneqarnerinut kikkut akiliisassanersut, Kalaallit Nunaanni Politiit aamma Peqqinnissaqarfiup isumaqatigiinngissutigaat. Danskit ministereqarfii inissiissapput.
Innuttaasoq qaqqamiitilluni qipinngululerpoq imaluunniit nakkarluni nissuni napivaa.
Pisut taamaattut politiit aamma peqqinnissaqarfiup akornanni isumaqatigiinngissutigineqarput, innuttaasup isumannaatsumut angallanneqarnissaanut katsorsarneqarnissaanullu oqartussaqarfik sorleq akisussaasuunersoq aalajangerniarneqartarpoq.
Tassami SAR-imi annaassiniartarnerit, Kalaallit Nunaanni Politiit aamma Issittumi Sakkutooqarfiup suliarisartagaasa, aammalu nakorsiartunik angallassisarnerit peqqinnissaqarfiup akisussaaffigisaasa akornanni immikkoortitsisoqartariaqartoq, politiit isumaqarput.
Justitsministeri Peter Hummelgaard (Soc.), folketingimi ilaasortamut Aaja Chemnitzimut (IA) taama ilisimatitsivoq:
Pinartuni ikiuisartut
- Politeeqarfiit naliliinerisa kingorna pisut akornanni innuttaasoq ajornartorsiortoq aamma/imaluunniit periarfeerunneqartoq annaassiniarnermi atortut atorlugit annaanniarneqartariaqartoq aamma/imaluunniit ujarneqartoq, aamma inuk ajoqusersimasoq imaluunniit napparsimasoq sumiiffimmi ilisimaneqartumit napparsimmavimmut angallanneqartariaqartoq pineqartillugit pisut immikkoortinneqartariaqartut, Kalaallit Nunaanni Politiit ilisimatitsipput, Aaja Chemnitzimut akissummi tamanna atuarneqarsinnaavoq.
Tunngaviusumik qimagussortitsinerit peqqinnissaqarfimmut innersuunneqartartut, politiit akissummi ilisimatitsipput, kisianni politiit pinartoqartillugu ikiuisarput:
- Pinartoqartillugu politiit paasissutissanik pisariaqartinneqartunik amerlanerpaanik pisoq pillugu sapinngisami pissarsiniartarput – nakorsiartup qanoq innera ilanngullugu, attaveqarfissat aamma sumiinnera – tamatumalu kingorna napparsimmavik qaninneq attaveqarfigineqartarpoq, peqqinnissaqarfiup suliamik suliarinninnissaanik qinnuiginnittoqartarluni.
Ministereqarfiit ajornartorsiut qulaajassavaat
- Peqqinnissaqarfik politiit ikiuinissaannut pisariaqartitsippat, tamanna politiit suliassaannik nalinginnaasunik salliutitsisinnaanermik nalilersuinikkut malinneqartarpoq, akissummi taama allaqqasoqarpoq.
Politiit qimagussortitsinermut atatillugu assersuutigalugu qulimiguulimmik imaluunniit angallammik attartorpata, taama peqqinnissaqarfik akiliissasoq, politiit ilisimatitsipput, kisianni peqqinnissaqarfik pisut ilaanni akiligassamik akiliineq ajortoq politiit misilittagaqarfigaa, politiillu taamaattumik akiliisariaqartarput.
Peqqissutsimut Naalakkersuisoqarfik kiisalu Kalaallit Nunaanni Politiit ajornartorsiutip qulaajarneqarnissaa pillugu ministereqarfimmut siornatigut saaffiginnissimasut, Justitsministeriet ilisimatitsivoq.
- Justitsministerietip Sundhedsministeriet peqatigalugu ajornartorsiut piaarnerpaamik qulaajarniarpaa. Suliassat tamakku Danmarkimi Sundhedsministerietimit § 169 naapertorlugu akisussaaffigineqartut, tamatumunnga atatillugu ilisimatitsissutigineqarsinnaavoq, justitsministeri Peter Hummelgaard akissuteqarnermini allappoq.