Tuberkulose ajugaaffiginiarlugu ataatsimoorlugu sorsunneq

Nunarsuaq tamakkerlugu TB-mut ulloritinneqartumi marsip ulluisa 24-anni, nunat WHO- mut ilaasortaasut kattuffiillu 2030 nallertinnagu TB-p atugaajunnaarnissaa anguniarlugu peqatigiinnissamut kajumissaaripput. Anguniagassatut siunniussaq taanna annertoqaaq.

Nunarsuaq tamakkerlugu 2000-imiit inuit 43 millionit inuunerisa annaaneqarsimanerat WHO-p naatsorsorpaa, sulili nappaammik TB-mik tuniluuttumik taassuminnga toqquteqartut ullormut 4000-t.

Atuaruk: Tuberkulose: Tunumiut quliugaangata sisamat tunillatsissimasarput

Nakorsarneqarsinnaasoq
Kalaallit Nunaanni TB-mik nappaatillit amerlanerujussuat suli ilungersuutigaarput.

2015- imi 81-it TB-mik nappaatillit paasineqarput. TB nakorsarneqarsinnaavoq, taamaammat piaartumik nappaatip suussusersineqarnissaa nakorsarneqarnissaalu pingaaruteqarpoq.

Tuberkulosep ulloqartinneqarneranut atatillugu nakorsaaneqarfiup maluginiaqquaa nittartagaqartoq, tassani nappaammut Nunatsinni paasissutissat nutaajunerpaat takuneqarsinnaapput.

Nittartagaq Tuberkulose.gl alakkaruk

Tassani atuarneqarsinnaavoq tuberkulose qanoq tuniluuttarnersoq, sunniutai suunersut, aamma illoqarfik sorleq tuberkuloserfiunerpaanersoq.

Unammillernartoq
Nakorsaanerup maluginiaqquaa, nappaat pillugu nalorsittaaruteqartoq, tassanilu eqqugassaqartoq.

- Ajoraluartumik Kalaallit Nunaanni TB-p nungutinniarnissaa ilungersunartuussaaq sulilu anguniakkamut tamatumunnga ungaseqaagut. Kalaallit Nunaalli periarfissagissaarpoq – nuna tamakkerlugu TB akiorniarlugu iliuusissanik siunniussineq nukittooq, Peqqinnissaqarfik tunniusimasoq, nappaammik suussusersiniaanermi periarfissat nutaat politikkikkullu tapersersorneqarneq.

Atuaruk: Sakialluut pillugu Sermersooq suliniuteqartoq

Atuaruk: Tupakuluusersimasoq: Toqungajappunga