Tilioq: Inuit innarluutillit suliffeqanngitsut amerlanerat ernumanarpoq
Misissuinerup takutippaa inuit innarluutillit amerlanerusut pisortanit pisartagaqartuusut, arlallillu kisimiittuullutik inuullutik. Tamanna ernumanartutut Tiliup nalilerpaa. Tilioq assingusumik aamma misissuisimavoq.
Nalunaarusiap "Inuit annertuumik innarluutillit" takutippaa eqimattami pineqartumi 75 procentit suliffeqarfeqarfimmiinngitsut pisortaniillu pilersuinermut tapiissutisisarlutik. 25 procentit suliffeqarput.
Tilioq isumaqarpoq Naalakkersuisut misissuinerat, Tiliup misissuineranut tapersiisoq. Tiliup misissuinini qaammammi matumani aamma saqqummersippaa.
Tamannalu ernumanarpoq:
- Isumakulunnarpoq misissuinerup allap aamma takutimmagu, inuit Innarluutillit amerlasuut suliffeqanngimmata. Suliffeqarsinnaanermut pisinnaatitaaffik inuit Innarluutillit pillugit isumaqatigiissumi pingaaruteqarluinnarpoq, inuiaqatigiillu suliffeqarnermi pisussaaffigaat inuit innarluutillit suliffeqarnissamik kissaateqarpata inissaqartinniarlugit aaqqissuussissallutik, inuit innarluutillit illersuisuat Christina Johnsen tusagassiorfinnut nalunaaruteqarluni oqarpoq.
Kisimiittut arlallit
Naatsorsuinerup allap takutippaa inuit innarluutillit 18-ileereersimasut 84 procentii kisermaajullutik inuusut. Inuiaqatigiinnut tamanut sanillersuutissagaanni inuiaqatigiinni tamani 51 procentit kisermaajullutik inuupput.
Tamanna isumakulunnartutut Tiliumit nalilerneqarpoq, inuimmi innarluutillit aappaqalernissamik ilaqutaqalernissamillu kissaateqarsinnaasunut, aappartaarniarneq ajornakusoornerusutut nalilerneqarsinnaammat:
-Innarluuteqarnerup paquminarunnaartinneqarnissaa pisariaqarpoq, inuiaqatigiit akornanni aamma suliffeqarnermi, kisianni aamma inuttut namminerisamik inuuneqarnermi. Inuit innarluutillit tusagassiuutini takutinneqarnerusariaqarput, qulequttani assigiinngitsuni tamani innarluuteqarnermut tunngasuinnaanngitsuni. Soorlu aningaasaqarnermut politikki, attaveqaqatigiinneq, ilinniartitaaneq imaluunniit inuiaqatigiinni oqallisigineqartut sammineqartillugit ilaatinneqarnerusariaqarput, Inuit Innarluutillit Illersuisuat Christina Johnsen oqarpoq.