Tasiilami suli suliassarpassuaqartoq
Tasiilami meeqqat pillugit suliat naammattumik suliareqqissaarneqarsimanngitsut, kvartalimi siullermi suli 130-iupput.
DR-ip piviusulersaarusiaani 'Byen hvor børn forsvinder'-imi, meeqqat sumiginnarneqartut, kinguaassiutimikkut atornerlugaasimasut imaluunniit imminut toqunnissamik navianartorsiortut pillugit suliat ilungersunartut kommunip qisuariarfigisanngikkai takutippaa.
Piviusulersaarummik immiussinerit siorna upernaakkut aamma ukiakkut pipput.
Tasiilami suliat suliarineqarniarnerini suli annertuumik ajornartorsiorfiusut, ukioq manna kvartalimi siullermi paasinarsivoq. Deloittemit killiffimmik nalunaarusiami tamanna atuarneqarsinnaavoq, taanna Sermitsiaq.AG-p allagaatinik takunnikkumalluni pissarsiaraa.
- Tasiilamut tunngatillugu meeqqat pillugit suliat 130-t missaanniittut suliareqqissaarnissaat suli amigaataasoq immikkut oqaatigisariaqarpoq, nalunaarusiami tamanna allaqqavoq, Kommuneqarfik Sermersuumi meeqqanut ilaqutariinnullu ataatsimiititaliap sapaatip-akunnerata siuliani tamanna oqaluuseraat.
Ilinniartitsisup ajornartorsiutit annertuut oqaluttuarai
Piviusulersaarut pillugu oqallinnermut atatillugu Tasiilami atuarfimmi ilinniartitsisuusimasoq, assinganik misigisaqarsimasoq Sermitsiaq.AG-p oqaluttuaraa.
- Nalunaaruterpassuarnik suliaqarpugut, kisianni qisuariartoqarnissaanut piffissaq sivisooq ingerlaqqaartarpoq imaluunniit qisuariartoqarneq ajorpoq, ilinniartitsisoq kinaassutsiminik isertuusserusuttoq taamani taama oqarpoq.
Nalunaarutit sumiginnaanernut, kinguaassiutitigut atornerluinernut aamma meeqqanut imminut toqunniarnerartunut tunngapput. Suliat ilungersunangaarmata, isumaginnittut qisuarianngikkaangata atuarfik ilaatigut qisuariartariaqartarsimavoq.
- Pisorpassuarni sulianut nammineq qisuariartariaqartarpugut. Suliat ilaanni meeqqat imminut toqunnissaminnik sioorasaarisarput.
- Taava atuartoq pineqartoq eqqissinissaata tungaanut issiaqatigalugu oqaloqatigisarparput, tassanilu taassuma pineqartup maanna imminut toqunnavianngitsoq qulakkeertarparput, ilinniartitsisoq nangilluni oqarpoq.
Nuup Tasiilallu akornanni uteqattaartinneqartut
Kommuneqarfik Sermersuup suleriaatsini siorna apriilimi allanngortippaa, taamaalilluni nalunaarutinik immikkut sulititat meeqqat pillugit suliat nutaat tamaasa nalilersortarpaat. Kisianni ukioq ataaseq qaangiutilersoq, ukioq manna kvartalimi siullermi suliat 130-t suliareqqissaarneqarsimanngillat.
Suliat uteqattaartinneqartarsimanerat ajornartorsiutit ilagaat.
- Suliat suliarineqarneranni akisussaaffik Nuummi misissuisut Tasiilallu akornanni uteqattaartinneqartarput, Deloitte allappoq.
- Suliat taakku isumaginninnikkut misissorneqarneri ulapputigalugit suliarineqarput.