Ilinniartitsisoq: Meeqqat ikiortariaqartut pillugu nalunaarutit suli uninngapput

Meeqqat imminut toqunnissamik sioorasaarisimasut imaluunniit atornerlunneqarsimasut pillugit nalunaarutit, Tasiilami suli uninngatinneqarput. Illoqarfiup atuarfiani qanittukkut ilinniartitsisuusoq, taama oqaluttuarpoq.

Piviusulersaarummi 'Byen hvor børn forsvinder' ilinniartitsisoq Rikke Blegvad oqaluttuarpoq, kommunip meeqqat pillugit nalunaarutit qisuariarfigisanngikkai.

Rikke Blegvadip nammineerluni siorna juunimi Tasiilaq qimappaa.

Nalunaarutit qisuariarfigineqartannginnerat suli ingerlavoq, Tasiilami atuarfimmi ilinniartitsisuusimasoq Sermitsiaq.AG-mut taama oqaluttuarpoq. Ilinniartitsisoq pineqartoq atuarfimmi ukiup aallartilaarnerani taamaatippoq.

- Nalunaaruterpassuarnik suliaqarpugut, kisianni qisuariartoqarnissaanut piffissaq sivisooq ingerlaqqaartarpoq imaluunniit qisuariartoqarneq ajorpoq, ilinniartitsisoq kinaassutsiminik isertuusserusuttoq taama oqarpoq.

Atuarfik qisuariartariaqarsimasoq

Nalunaarutit sumiginnaanernut, kinguaassiutitigut atornerluinernut aamma meeqqanut imminut toqunniarnerartunut tunngapput. Suliat ilungersunangaarmata, isumaginnittut qisuarianngikkaangata atuarfik ilaatigut qisuariartariaqartarsimavoq.

- Pisorpassuarni sulianut nammineq qisuariartariaqartarpugut. Suliat ilaanni meeqqat imminut toqunnissaminnik sioorasaarisarput.

- Taava atuartoq pineqartoq eqqissinissaata tungaanut issiaqatigalugu oqaloqatigisarparput, tassanilu taassuma pineqartup maanna imminut toqunnavianngitsoq qulakkeertarparput.

Nuna tamakkerlugu ajornartorsiutaasoq

Tasiilami ilinniartitsisoq pakatsinartumik kisiam misigisaqanngilaq. Nuna tamakkerlugu ilinniartitsisut misigisimasarput, nalunaarutit iluamik tiguneqarneq ajortut. Ilinniartitsisut kattuffiat, IMAK taama oqaluttuarpoq.

- Tasiilamiinnaanngitsoq nunarpulli tamakkerlugu ilinniartitsisorpassuit inunnik isumaginnittoqarfimmut kinguneqanngitsumik nalunaaruteqartarneri IMAK-ip siulersuisuisa ilisimasaqarfigaat, IMAK-imi siulersuisut tusagassiuutinut nalunaarummi taama allapput.

IMAK naapertorlugu piviusulersaarut annilaarnaraluartoq, paasissutissat saqqummiunneqartut tupaallaatigivallaanngilaat.

- Suliat ilaat takutinneqartumiit assigiinngissitaarsinnaapput, qularutissaanngilarli ukiuni kingullerni Kommuneqarfik Sermersooq suliniutinik arlaqartunik aallartitsisimammat. Kisianni nalinginnaasumik takusat ersaripput annilaarnarlutillu. Suliarpassuit piviusut tigussaasumik qanoq iliuuseqarfigineqarsimanngillat. Meeqqat inuusuttuaqqallu amerlasuut piffissami sivisuumi ikiorserneqartarsimanngillat.

- Ilinniartitsisorpassuit iliuusissaaleqisutut misigisimasarput atuartoq pillugu arlaleriarlutik nalunaaruteqaraluarlutik susoqarneq ajormat, takusinnaallugulu atuartoq ajortikkiartuinnartoq.

Misigissuserlu taannarpiaq Tasiilami ilinniartitsisup misigisaraa.

- Neriuutigigaluarpara iliuuseqarnerusinnaallunga, taanna oqaloqatigiinnitsinni arlaleriarluni oqarpoq.

Ilinniartitsisup aqqa aaqqissuisoqarfimmi ilisimavarput.