Tasiilami sukkanerusumik iliuuseqartoqarnissaa Atassutip Demokraatillu piumasaringaat

Tasiilami inunnik isumaginninnikkut pissutsit pitsanngorsarneqarnissaat qularnaarumallugu 5 millioner koruuninik immikkoortitsisoqassaaq.

Demokraatit taama siunnersuummik saqqummiussaqarput, siunnersuulli Atassutikkunniit taperserneqarpoq.

Tasiilamilu immikkut aningaasaleeqqittoqarnissaa naalakkersuisoqatigiinnit taperseqanngilaq.

Siunnersuut ilaqutarinnermut- peqqissutsimullu ataatsimiititaliami suliarineqarsimavoq. Suliniutit aallartinneqareersimasut qanoq kinguneqarnissaat takoqqaarumallugu IA aamma Siumut akerliinerminnut tunngavilersuutigaat.

Taamaammat taakku siunnersuutigaat, 'suliniutit aallartinneqareersut nalilersorneqarnissaat amerlanerussuteqartut kissaatigaat, taamaaliornikkut sapinngisamik pitsaanerusumik siumut isigisumik paasissutissiinermik tunngaveqartumik ilassutitut iliuuseqarsinnaaneq suliniuteqarsinnaanerlu eqqarsaatigineqarsinnaaniassammat.

Aamma atuaruk: Demokraatit Tasiilami suliniuteqartoqarnissaa kissaatigaat

Ataatsimiititaliamilu Atassutip ilaasortaatitaata, Mala Høy Kuko nalilersuinerit utaqqinagit kisiannili ukiup tulliani immikkut iliuuseqartartiaqartut isumaqarpoq.

- Tasiilami ajornartorsiutit ilisimaneqarlutillu ilungersunarmata maannakkorluinnaq naalakkersuinikkut iliuuseqartoqassasoq Atassut isumaqarpoq. Nalilersuinerit pitsaasinnaapput ajornerpaassappalli naalakkersuinikkut iliuusissanik piumasaqaataasunik sanngiillisitsisinnaapput, taanna ikinnerussuteqarluni oqaaseqaammini taama allappoq.

Demokraatit ilaqutariinnermut- peqqissutsumullu ataatsimiititaliami ilaasortaatitaqanngillat.

Siunnersuut aqagu Inatsisartuni inaarutaasumik suliarineqassaaq, siunnersuulli amerlanerussuteqartunit Siumut, IA aammalu Partii Naleqqamit akerlilerneqarnissaa ilimanarpoq.