upernaakkut ataatsimiinneq
Demokraatit Tasiilami suliniuteqartoqarnissaa kissaatigaat
Tasiilami immikkut suliniuteqarnissamut ukiumut 5 millionit koruuninik immikkoortitsinissamik Demokraatit piumasaqarput.
Tasiilami inunnik isumaginninnikkut ajornartorsiutit immikkut suliniuteqarfigineqarnissaminnik pisariaqartitsipput.
Demokraatit tamatumunnga siunertamut ukiumut 5 millionit koruuninik aningaasanik immikkoortitsisalerusuttut isumaqarput.
Maanna iliuuserineqartut naammanngitsut
Meeqqat affaat inunnik isumaginnittoqarfimmi suliatut nalunaarsorneqarsimasut, nunatsinni imminut toquttartut amerlanersaasut, angerlarsimaffimmi eqqissiviilliornerit amerlanerpaat tulliusut, Nuummi arfineq-pingasoriaammik inuttunerusumit taamaallaat qaangerneqarsimalluni.
- Taakku ajornartorsiutit iluarsineqassappata pisariaqarpoq annertuumik, angusassamik toraagaqarluni, arlalinnik iliuuseqarnissaq, kommunip tungaaniinnaanngitsoq aamma namminersorlutik oqartussat tungaannit, Randi Vestergaard Evaldsen (D) ullumi Inatsisartuni saqqummiussinermini oqarpoq.
Tasiilami maanna Naalakkersuisut arlalinnik suliniuteqarnerit partiip ataqqivaa, kisianni tamatuma naammannginnissaa partiip ernummatigaa.
Taamaammat immikkut ittumik suliniuteqarnissamik siunnersuuteqarput, tamannalu kommunit qanimut suleqatigalugit pissaaq.
Suut iluaqutaanersut Naalakkersuisut misissorniarpaat
Namminersorlutik Oqartussat aamma kommunip Tasiilami suliniutit aallartinneqarsimasut Naalakkersuisut erseqqissaatigaat. Suut iluaqutaanersut aamma suut iluaqutaannginnersut nutaamik iliuuseqartoqannginnerani paasineqaqqaartariaqartut isumaqarput.
Aamma atuaruk: Tasiilami aaqqiissutissamik politikkerit piumasaqarput
- Naalakkersuisut isumaqarput maannakkuugallartoq aningaasanik amerlanerusunik immikkoortitsinngikkaluarluni Tasiilami isumaginninnikkut suliniutaareersut sunniutigisimasaasa misissuiviginissaat pissusissamisoortoq, Sara Olsvig (IA) Demokraatinut akissuteqarpoq.
Taanna allannguutissatut siunnersuummik saqqummiussivoq, Naalakkersuisut ukiaanerani 2017-imi ataatsimiinnerup aallartinnginnerani suliniutit pillugit nalunaarusiornissaanut peqqussuteqartumik, soorliit pitsaasumik kinguneqarnersut paasiniarlugu.
Siunnersuutit ullumi ataatsimiititalianut suliassanngortillugu ingerlateqqinneqarput.