Taamaammat mittarfissualioqqinnissanut akissaqanngilaq

NALILIINEQ: 'Tamanna paasinarsereerpoq ukiut tallimat namminersorlutik oqartussat pioreernerisigut aningaasaqarneq imminut napatittoq anguniarlugu aaqqissuusseqqinnernik malunnaatilinnik suliaqartoqarsimanngimmat.'

Aningaasaqarnermut Siunnersuisooqatigiit 2014-imi nalunaarusiaata aallaqaataani taama oqaasertaqarpoq.

Tamannalu aamma uggornaraluartumik ullumikkut atuuppoq, Naalakkersuisut ippassaq 2016-imut aningaasanut inatsisissatut siunnersuutaat saqqummiunneqareernerata kingorna. Upernaaq aningaasanut inatsisissatut siunnersuut assigalugu Naalakkersuisut angakkuarnertut ilillutik aaqqissuusseqqinnerit isertitaqartitsisussat ukiumik ataatsimik kinguarteqqippaat.

Atuaruk: 65 millioner koruuninik amigartooruteqarnissaq siunnersuutigaa

Qaammatit tulliuttut ersersissavaat, Anda Uldumip tunuliaqutaata aaqqissuusseqqinnernik piumasaqaqisut tigussaasumik siunnersuutituaa - islandermiut ilaarlugit - aalisartut pisaannit tamanit akileraarutitigut aningaasanik isertitsinissaq naammagissaneraat.

Pisassiissutit tunissutitut
Aalisanermi akitsuusersuinikkut aaqqissuusseqqinneq aalisartunut minnerusunut annerulaanullu tigujuminarsarniarlugu, Anda Uldum siunnersuuteqarpoq, aalisarnerup ineriartornissaanut aningaasat agguagassat 15 millionit koruunit aningaasaliissutigissallugit, naak ukioq manna aningaasaliiffigineqanngikkaluartoq.

Aalisarneq inuussutissarsiut angisoorsuugaluarpoq aningaasarpassuaqarlunilu, kisiannili tamatuma allanngortissanngilaa, ukiaanerani Inatsisartut ataatsimiinneranni sulisartoq nalinginnaasumik isertitalik aningaasatigut annertunerusumik allannguiffigineqassamaarpasinngilaraasit.

Aaqqissuusseqqinnerit tunuarteqqillugit
Allannguutit ilagaat soraarninngortarnerup kingusinnerulaalersinneqarnera ukiuni arlalinni naalakkersuisooqatigiinnilu taarserartuni saqqummiunneqartartoq - atuutsilersinneqarlunilu taasissutigineqarneq ajortorsimasoq.

Nunat allat nalinginnaasumik assersuuttakkagut sukateripput, siunissamut aningaasaliinissaminnut pingaarutilimmut akissaqarnissartik qulakkeerumallugu.

Nunami annertuunik aaqqissuusseqqinnernik imaluunniit tunisat amerliartunngippata, nunap karsia amigartuulertarpoq.

Mittarferujussuaqalissanngilaq
Aningaasaqarnermut naalakkersuisup marlunngornermi tusagassiortunik katersortitsinermini tusagassiortut takkuttut nassuiaaffigai, atlantiku qulaallugu timmisartunut mittarfiliornissamut aningaasaliiniarluni eqqarsaateqarani.

Allanilluunniit aningaasaliisunik ikiorsiisoqaraluarpat, taamaallaat 1.199 meterisut takigisunik mittarfinnik tallisitsinissanut arlaqanngitsunut aningaasassaqarpoq. Takissuseq nutaaq maanna angallanerup ilusaanit allaanerungaarnavianngitsoq.

Islandimit timmisartornerit
- Taanna periusissaq sukkanerusumik akikinnerusumillu angalanissamut anguniarparput, Anda Uldum nassuerpoq.

Tallilertuinissap pilersaarusiornerinnaa 60 millionit koruuninik akeqassaaq.

Ilisimaneqanngilaq naalakersuisooqatigiit mittaarfeeqqat qassit 1.199 meterinngorlugit tallissaneraat, kisianni minnerpaamik timmisartuaqqat Islandimiik amerlanerusut Ilulissanitut Nuummitullu tikittalernissaat malunnaataassaaq.

Nunanit allanit silaannakkut angallatut tikittarnerat siunissami Kangerlussuakkoortuaannarnissaat Naalakkersuisut marlunnik peqquteqartippaat:

1.) Mittarfiit takisoorsuit sanaartornissaannut akissaqanngilagut, aamma 2.) Nunarput tajornarianik taamak amerlatigisunik tigusinissaminut piareersimanngimmat akimmiffinngorsinnaavoq.

Atuaruk: IA nersualaarivoq: Naalakkersuisooqatigiit piviusorsiulersimapput