Aningaasanut inatsit
IA nersualaarivoq: Naalakkersuisooqatigiit piviusorsiulersimapput
Annertuumik aaqqissuusseqqinnikkut isertitaqarnissamik Naalakkersuisut imatorsuaq neriuuteqarunnaarsimapput, tamannalu illua'tungiliuttut nuannaarutigaat
Partiit illua'tungiliuttut annersaasa ullumi marlunngornermi Naalakkersuisut aningaasanut inatsissatut saqqummiussaat isornartorsiorpaat - akaarinnippasissumilli.
– Siunnersuutaanni kisitsiserpassuit taamaaginnarput imaluunniit annikitsuinnarmik iluarsiivigineqarsimallutik, IA-p siuilttaasua Sara Olsvig oqarpoq.
Aaqqissuusseqqinnernut
aningaasat ikinnerusut
Taassuma nuannaarutigaa Naalakkersuisut aningaasanut inatsisissatut siunnersuumminni annertuumik aaqqissuusseqqinnikkut isertitassatigut naatsorsuutigisatik annikillisissimammatigit.
Ilimasaarutigineqarsimagaluarpoq aaqqissuusseqqinnerit ukiumi ataatsimi 70 millioner koruunit inulaarlugit isertitsissutaajumaartut, taakkualu 10 millioner koruuninut annikillisinneqarsimapput.
– Upernaaq kisitsisit isumalluarpallaartumik saqqummiunneqartut pissutaaqataapput taamanikkut aningaasanut inatsimmut tamarmiusumut akerliulluta taasinitsinnut. Ullumikkut takusinnaavarput ernumanartoqartitsinermut ilumoortuusimasoq.
Inatsisartuni suleqataajumalluni neriorsuutigaa
Sara Olsvigip ersarissumik nuannaarutigaa Anda Uldumip annertuumik aaqqissuusseqqinnissamik neriorsuutini annikillisangaatsiarsimammagit.
Imaanngilarli Sara Olsvigip aaqqissuusseqqinnissamik siunnersuutit akerleriniarai.
– Partiit tamarmik isumaqatigigunarpaat aningaasaqarniarneq ilorraap tungaanut aallartinniarlugu arlaatigut aaqqissuusseqqittoqartariaqartoq, taanna oqarpoq.