Sulinermik unitsitsineq: Peqqinnissaqarfimmi qullersat pilersaaruteqarlutik piareersimapput
Portørit tallimanngornermi ullup-qeqqaniit akunnerni sisamani sulinerminnik unitsitsippata, nakorsiartut eqqorneqartut appasinnerpaatinnissaat anguniarlugu, peqqinnissaqarfimmi qullersat pilersaaruteqarlutik piareersimapput.
Dronning Ingridip Napparsimmavissuani portørit tallimanngornermi akissarsiatik sulinermilu atukkatik pillugit oqaloqatigiinniarlutik akunnerni sisamani sulinerminnik unitsitsippata, suliassat arlaqartut unittuussapput.
Ilaatigut nakorsiartut illoqarfinni allaneersut timmisartoqarfimmiit timmisartoqarfimmullu ingerlanneqarsinnaassanngillat. Ingerlassinerit nakorsaatinillu tunniussiartornerit unitsinneqassapput. Nakorsiallu napparsimmaviup iluani immikkoortortaniit immikkoortortanut ingerlanneqartussanut portørit sullississanngillat.
Portørit 21-it aalajangersimasumik atorfeqartinneqarput, taakkunannga pingasut ataatsimiinnerup nalaani pinartoqartillugu suliassanut sillimasuussapput.
Ullormut pilersaarutit
Peqqinnissaqarfimmi qullersat taamaammat pilersaarummik piareersaavoq, sulinermik unitsitsinermi nakorsiartut ikinnerpaat eqqorneqarsinnaanerat anguniarlugu, peqqinnissaqarfimmi qullersat tusagassiutinut nalunaarumminni ilisimatitsipput.
Sulinermik unitsitsinermi suliassat uku eqqorneqassapput:
- Aaviisarfimmut, qinnguartaavimmut, pilattaavimmut, timimik sungiusaavimmut utimullu angallassineq.
- Immikkoortortaqarfinniit mittarfimmut angallassineq.
- Mittarfimmiit immikoortortanut angallassineq.
- Angerlarsimaffinniit Napparsimmavissuarmut angallassineq utimullu angallassineq.
- Nakorsiat nalinginnaasumik Napparsimmavissuarmiit tassanngalu uterluni angallanneqarnissamut neqeroorutaanik atuisut namminneq angalanissartik isumagisariaqassavaat. Pilaanissat ullup qeqqaniit sisamat tunganut pilersaarutaasut ingerlanneqassapput, peqqinnissaqarfimmi qullersat tusagassiutinut nalunaarumminni allapput.
Nakorsiat mittarfimmut imaluunniit mittarfimmiit ingerlasussat taxakortinik akiliutaasartunik tunineqassapput, sapinngisarlu tamaat nakorsiat ingerlaqatigiisinnissaat ataqatigiissarneqassalluni, peqqinnissaqarfimmi qullersat ilisimatitsipput.
Ullormut angallassanerit arlallit
Portørit napparsimmavinni ullormut suliassarpassuaqartarput. Nakorsiat pitsorluttut illoqarfimmi najugaqartut nakorsaatissaannik pajuttarpaat. Nakorsiat pitsorluttut nakorsiarsinnaaniassammata aasarpaat, nakorsiareerpatalu angerlaattarlugit. Nakorsiallu immikkoortortamiit immikkoortortamut nuunneqassagaangata sullissisarlutik.
Suliassat ilaannai taaneqarput.
Nuummi portørit siorna februaarimi 1.861-riarlutik angallassisarsimasut, Nuummi portøri, Hansine Thorin Sermitsiaq.AG-mut ilisimatitsivoq.
Angallassinerit assigiinngitsuupput, soorlu Dronning Ingridip Napparsimmavissuanit nakorsiat, pinartoqartillugu ambulancenik angallassinerit, pitsorluttunillu issiavinni kaassuartakkanik atuisunik angallassinerit.
Portørit ukiumut angallassisarnitik nalunaarsorsimavaat, taassumallu takutippaa 2017-imi katillugit 23.474-eriarlutik angallassisimasut. Agguaqatigiissillugu qaammammut 1.956-eriarlutik angallassisarsimallutik.
Pinartoqartillugu upalungaarsimaneq nalinginnaasumik ingerlassaaq
Peqqinnissaqarfimmi qullersat ilisimatitsipput portørit sulinerminnik unitsitsinerisa nalaanni upalungaarsimaneq nalinginnaasumik ingerlaannassasoq.
Sulinermik unitsitsinerup nalaani suliassat uku eqqorneqassanngillat:
- Pinartoqartillugu ambulancinik angallassineq.
- Akiutiniittunik mittarfimmut aallerneq.
- Napparsimmavissuarmi pinartoqartillugu kalerisaarinerit.
- Suliassat inuunermik navianartorsiulersinnaanermut innarluuteqalersinnaanermullu tunngasut allat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...