Studieadjunkti meeqqat aalalluartarnerat pillugu: Suli angunngilarput
Kalaallit meeqqat nunarsuarmi aalanerpaat ilaanniinnerat nuannaarutigaa. Kisianni Ilinniartitsinermik Ilisimatusarfimmi studieadjunktip Victoria Blackip, innuttaasut affaasa oqimaappallaarnerat isiginngitsuusaarnianngilaa.
Victoria Black Ilinniartitsinermik Ilisimatusarfimmi eqaarsaartitsinermut silamiinnermilu studieadjunktip, kalaallit meeqqat inuusuttullu nunarsuarmi aalanerpaat ilaanniinnerat pillugu nutaarsiassaq nuannaarutigaa. Kisianni innuttaasut tamatuma uninnganerulersissagai ernumassutigaa.
- Maanna angusassap anguneqarsimaneranik isumaqartoqalernera ernumanartissinnaavara.
Victoria Blackip oqarnera naapertorlugu innuttaasut affaat oqimaappallaarmata, ilaatigut ernumassuteqarpoq.
- Innuttaasut ilarpassui naammaginanngitsumik aalasarnerat pillugu allanik nalunaarusiarpassuaqarpugut. Meerartatta aalanerat pitsaavoq, kisianni tassanngaannaq allanngortoqariasaarsinnaavoq, Victoria Black oqarpoq.
Meeqqat pinnguarnerusarput
Innuttaasut aalasarnerisa qaffasinnera qanoq ilinermi aappariartulertarnersoq studieadjunktip ilisimaqqissaanngilaa, kisianni inuit attaveqaqatigiittarfii pissutaaqataasutut pasivai.
- Meeraanermit inuusuttuaranngulernermut pisoqartarpoq, taanna isumaqarpoq.
Misissuineq Naalagaaffiup Peqqissutsimut Ilisimatusarfiani ilisimatusartunit suliarineqaraluartoq, meeqqat inuusuttullu 11-nit 16-inut ukiullit aallaavigineqarput, peqataasullu 79 procentii 13-it ataallugit ukioqarput.
Meeqqat taamatut ukiullit pinnguarnerusartut isumaqarpoq – taamaalillutillu aalanerusarlutik.
- Sermitsiaq.AG-mi qulequtaq kisiat atuaraanni (Kalaallit meeqqat inuusuttullu nunarsuarmi aalanerpaat ilaanniittut, aaqq.), taava pitsaalluinnartuuvoq, kisianni immaqa taamaattuaannarnikuuvoq?
Kulturimi allannguineq
Nunatsinni innuttaasut 2030-imi nunarsuarmi aalanerpaanngornissaannik Timersoqatigiit Kattuffiat anguniagaqarpoq. Anguniagaq piviusorsiortuunersoq, Victoria Black ima oqarpoq:
- Tamakkiisumik piviusorsiortuunersoq qularnartippara, innuttaasullu affaasa oqimaappallaarnerat oqaatigeqqippaa.
Taamaattoqassappat kulturimik allannguisoqartariaqarpoq, Victoria Black oqarpoq, ilaatigut suliffeqarfinni aamma illut qanoq aaqqissugaanerannik allannguisoqartariaqartoq oqaatigaa.
- Ilaatigut qiteqqunnermi aalasarnermut tunngavoq, kantiinami nerilluni issiaannartoqarani. Illut qanoq sananeqarnerat, Nuuk Centerip majuartarfiit ingerlasut illup qeqqanut inissinneqarput, taamaalilluni taakku nammineq majuarfissanut taarsiullugit taakku toqqarneqartarput.
Allatut oqaatigalugu aaqqissugaaneq tamarmiusoq iliuuseqarfigineqassaaq, taanna isumaqarpoq, nangipporlu:
- Minnerusumik iliuuseqarnikkut allornerit innersuunneqartut anguneqarsinnaapput.