Sisimiut
Sisimiut timersortarfia oquk pissutigalugu matussaaq
Illorsuup taassuma nutaanngililersup aserfallatsaalinissaa 12 millionit koruunit missaanik akeqassaaq. Kisianni aningaasartassaat nassaariuminaapput
Sisimiuni timersortarfik oqummik ajornartorsiuteqarneq pissutigalugu maajimi matussaaq, aqutsisut taama ilisimatitsipput.
Illorsuup oqorsarneqarnera iluaqutaavallaarunnaarsimavoq, matut, iikkat qalissiallu nillermut masammullu illersuutaanerat tamakkiisuujunnaarsimavoq. Isugutaap piliaanik timersortarfiup naqqa tamarluinnarmi oqoqalersimavoq, taamaasilluni peqqinnissamut navianarsisinnaanera aarlerinarsisimalluni.
12 millionit
Titartaasarfik Masanti A/S naliliivoq timersortarfik 12 millionit koruunit missaani nalinganut aserfallatsaalineqartariaqartoq, taakkuninngalu 3 millionit koruunit missaaniittut oquup piaarnerpaamik piuneerunnissaanut pinaveersaartitsinissamullu atorneqartariaqartut.
Kisianni piaartumik aaqqiinissamut qulannaveequteqartoqanngilaq.
Timersortarfik imminut pigisuuvoq, aserfallatsaaliinissamullu nammineq aningaasaateqanngilaq.
Akiliutit
Timersortarfik kommunimiit toqqaannartumik tapiissutinik pissarsineq ajorpoq, kisiannili timersoqatigiiffiit kiisalu meeqqeriviit tiiminik atuineri malillugit kommuni taakkununnga 100 procentimik tapiissuteqartarpoq, timersortarfimmullu akiuteqartarluni. Kingullermillu kommunip tiimimut akiliutini annertusinikuuai.
Atuaruk: Oqummik akiunissamut millionit koruunit
Taakkuli isertitat naapertuuttumik aserfallatsaaliinissamut ileqqaagaqarnissamut toqqammaviliisinnaasimanngillat.
Aamma Namminersorlutik Oqartussat tungaannit tapiisoqarsinnaarpasinngilaq.
Oqaloqatigiilluarnerit
Qeqqata kommuniani borgmesteri, Kultureqarnermut ilinniartitaanermullu ataatsimiisitaliaq kiisalu atorfilittat pitsaasumik ammasumillu oqaloqatigineqartarneri ingerlapput, Timersortarfimmilu siulersuisut qinnuteqaateqarput siullermik 3 millionit koruuninik taperneqarnissamik, taamaasilluni aasariartornerani oquk peerniarneqarsinnaaniassammat.
Timersortarfiup qaqugu ammaqqikkumaarnera suli oqaatigiuminaappoq.