Silap pissusiata appanniartarneq aamma navianartorsiortippaa

Kalaallit Nunaanni appat piaqqisartut ukiorpaalussuarni kingullerni ikileriaateqarujussuarsimapput. Ilisimatusartartut isumaqarput piniagaasarnerat ikiliartornerinut kisimi peqqutaanngitsoq aammali silap pissusiata allanngornera peqqutaaqataasorilerpaat.

Ilisimatusarneq

Silap pissusiata allanngornerata kinguneri ukiorpaalunngulersuni tusartariileqaagut, kisiannili Kalaallit Nunaanni qanoq iliorluta allanngoriartuutinut naleqqussarsinnaanerput
eqqartungaassanagu.
Issittumi Siunnersuisooqatigiit ilisimatusartartunut Canadameersunut, Kalaallit Nunaanneersunut Danmarkiminngaanneersunullu nunarsuup issittortaata immikkoortuinut Kalaallit Nunaata kitaani Canadallu kangiani silap pissusiata allanngorneranut naleqqussarniarluni iliuuserineqarsinnaasunik innersuussuteqaqqullugit suliakkiuteqarsimapput.
Innersuussutit
Kalaallit Nunaanut tunngatillugu ilisimatusartartut suliassaqarfinni assigiinngitsuneersunik
suleqateqarlutik paasissutissarpassuarnik katersuipput, soorlu atortulersuutinut,
ilinniartitaanernut, aatsitassanut allanullu tunngassuteqartut paasissutissat katersorneqarlutik.
Taamaaliortoqarpoq ukiuni 2013-imiit 2016-ip tungaanut, maannalu suliat inernerannit
innersuussutit piareerneqarput. Inernerit innersuussutillu Nuummi sapaatip akunnerata tulliani saqqummiussorneqassapput, ataatsimiinneq Pinngortitaleriffimmi pissaaq marlunngorneq 11. septembarimiit 13. septembari ilanngullugu ingerlanneqassalluni.
Allaaserinnittoq
Pinngortitaleriffimmi ataatsimiinnissaq sioqqullugu ilisimatusartartut naluaarusiami ”Adaptation Actions for a Changing Arctic”-imi (Issittumi allanngoriartortumi naleqqussarnissamut
iliuusissat) suliaqaqataasimasut allaaserisaaqqanik ataatsimiinnissamut qilanaartuutitut Sermitsiaq.AG-mi ilanngussaqartassapput. Ataatsimiinnissap tungaanut ullut tamaasa
ilanngussaqartarnissami allaatiginnittoq siulleq tassaavoq Pinngortitaleriffimmi seniorforsker Flemming Ravn Merkel.

Kalaallit Nunaanni appat piaqqisartut ukiorpaalussuarni kingullerni ikileriaateqarujussuarsimapput.
Islandimi Svalbardimilu aamma appat piaqqisartut sivikinnerpaamik ukiuni qulikkaani kingullerni
marlunni ikiliartuinnavissimapputtaaq.

Kalaallit Nunaanni pissutsit ukiorpanni kingumut qivaraanni
appat ikiliartornerinut peqqutaakkajunnerusimasut tassaapput appat ineqarfiini piniartarnerit,
pisarisuugaasarsimanerat akornusersuutaasartullu. Maannali ilisimatuussutsikkut mississuinerit
takutippaat appat piaqqisartut ikiliartornerinut silap ukiuni qulikkaani arlalinni pissusaanik aamma peqquteqarsinnaasoq.

Peqqutaasut

Eqqornerusumik taallugu Kalaallit Nunaata kitaata kujataata imartaani
sarfaqarfiit allannguuteqarfiusimanerinik peqquteqarsimasinnaassasortaaq ilimagineqalerpoq.

Tamaanimi ukiuunerani appat amerlaqisut ukiisarput. Maannaagallartoq ilisimaneqanngilaq sooq
sarfaqarfiit allannguuteqarnerat appaqassutsimut taama sunniuteqaqataalersimanerat,
ilisimagineqarporli sarfaqarfiit allanngornerat appat neriniartariaasiannut sunniuteqarsimasinnaasut.

Taamaattoqarnera appanut ajuippoq aammalu siunissami piniagassaqarniarnermuttaaq. Tassami appaqassutsip silap pissusianit ajortumik sunnersimaneqarneranut iliuusissatuaq tassaavoq appat pisarineqartartut ikilisittariaqarnerat.

Ikiliartuinnarnerat ilutigalugu pisaasartut
ikilisikkiartuaartinneqartariaqarput, taamaaliunngikkaannimi piniagaanerat piujuartitsiniarnermik tunngaveqassanngimmat.
Appat piujuartitsiniarnermik tunngaveqartumik piniagaajuarnissaat siunissamuttaaq qulakkeerneqassappat, nunat Atlantikup avannaaniittut akimorlugit suleqatigiittoqartariaqarpoq.

Appat ukiuunerani piniagaanerusarput, Kalaallit Nunaanniinnaanngitsoq, aammali Canadami amerlavallaanngitsunillu Islandimi aamma pisarineqartarput. Appat piaqqisartut nunanit taaneqartuneersut ukiuunerani ilaatigut Kalaallit Nunaata kitaata kujataata imartaani akulerullutik
ukiisarput, taamaammallu nunani taakkunani ukiuunerani appattarineqartartut nunat pineqartut appaqassusiinut tamanut sunniuteqartarput. Taamaammaallu nunat pineqartut immikkoortitaarlutik ullumikkutut imminnut attaveqanngivillutik appanniartarnernik aqutsinerat iluarinanngilaq.

Nalunaarusiaq

Nalunaarusiamit Kalaallit Nunaata kitaanut Canadallu kangianut taakkualu akornanni imartanut tunngassuteqarunit naggasiutaasnut innersuussutigineqartunullu una allaaserisaq assersuutissaavoq. Uani
Kalaallit Nunaanni appat killiffiat naatsumik allaaserineqarnerani kapitali pisuussutinut uumassusilinnut tunngasoq assersuusiorfigineqarluni.

Nalunaarusiap imarisai pillugit Nuummi innuttaasunut Pinngortitaleriffimi marlunngorneq 11. september
2018 nal. 19-21 ataatsimiititsisoqassaaq.

Powered by Labrador CMS