Savaaqqat Islandimeersut Neqimi suliffissaqartitsisut

Islandimit savaaqqanik eqqussuineq Narsami uumasunik toqoraavimmi Neqimi suliassaqarnerulernermik pilersitsivoq.

Maannamut uumasunik toqoraavik savaaqqanik 3.000-inik Islandimeersunik pissarsereerpoq. Tassani suliarineqassapput nioqqutissiarineqarlutik.

Suliffiit aqqaneq-marluk
Savaaqqaat pineqartut nioqqutissiarinerat qaammatit tulliuttut marluk Neqimi suliassaqartitsissapput. Savaaqqat 1000-jugaangata suliffissat 12-it pilersinneqartarput. 2016-p naanissaata tungaanut savaaqqat allat 7000-it missaat Islandimit tikisinneqarlutik nioqqutissiarineqarnissaat aamma pilersaarutaavoq.

Atuaruk: Neqimut savaaqqat ikinnerusut

- Islandimiit nioqqutissiassanik tikisitsivugut Narsami toqoraavimmi suliassaqartitsiinnarumalluta aammalu sulisut piginnaanerilersimasaat annaajumanatigit. Massakkut qanoq iliuuseqanngikkutta sulisunik angerlartitsinissaq periarfissatuaavoq, taamaassappallu fabrikki nutaaliaasoq atorneqarani matugallassalluni, Neqimi pisortaq Per Jensen, tusagassiuutinut nalunaarummi naqissusiivoq.

Savaaqqat nunatsinneersut ikinnerusut
Nunatsinni savaatillit toqoraavimmut tunisartagaat savaaqqat savallu ukiut kingulliit marluk malunnartumik ikiliartorput, 2015-mi tunineqartut ukiup siulianut sanilliullugu 2.392-nik ikinnerullutik.

Pissutsit ukiuni aggersuni taamaaginnarnissaat ilimagineqarpoq, taamaammallu ilisimaneqalereerpoq nioqqutissiorsinnaassuseq tamakkiisoq angussagaanni uumasut 10.000-12.000-nik amerlassuseqartut amigaatigineqarnerat.

Pissutsit taamaannerat Neqi A/S-imut annertuumik unammilligassaqarpoq. Nunatsinni savaatilinnit tunineqartut amerlinngippata periarfissatuaavoq nioqqutissiassanik avataaniit tikisitsineq, taamaasilluni pisisartut noqqaassutigisaasa tunniunnissaat suliffiillu pingaarutillit pigiinnarnissaat angusinnaaqqullugu.

Atuaruk: New Zealandimit savaaqqat tikisitat suliffissaqartitsisut