Narsaq

New Zealandimit savaaqqat tikisitat suliffissaqartitsisut

Savaaqqat New Zealandimit tikisinneqartunut nioqqutissiorneq Narsami aqqaneq marlunnik suliffissanik pilersitsivoq

Neqi A/S Narsamiittoq

Piffissami junip naaneraniit septemberip aallartinnerata tungaanut Narsami Neqi A/S-imi savaaqqanik 3.000-nik New Zealandimiit tikisitanik nioqqutissiorneq ingerlanneqarpoq.

Qaammatit pingasut ingerlaneranni suliffissat 12-it pilersinneqarput, nioqqutissiassaaleqinerlu pissutigalugu matoqqanissaq taamalu sulisunik angerlartitsiinnarnissaq pinngitsoorneqarpoq.

KNI tusagassiuutinut nalunaaruteqarpoq.

Nutarsaaneq
Neqi A/S 2013-mi nutarterneqarpoq. Tamatuma kingorna ukiumut nioqqutissiarineqarsinnaalerput savat savaaqqallu 32.000-it. Kujataani savaatillit 2014-mi savat savaaqqallu 22.000-it toqoraavimmut tunivaat. Taakku nioqqutissiarineqarlutik tamarmik nunatsinni pisiniarfinnut tunineqarput junimi.

- New Zealandimiit savaaqqat neqaannik pisiniarnissatsinnut patsisaavoq savaaqqat neqaannik nunatsinni pisisartut noqqaassuteqarnerisa annertusiartuinnarnera minnerunngitsumillu fabrikkimi sulisut sulisoriinnarnissaannik kissaateqarnerput. Pingaaruteqarpoq oqaatigissallugu New Zealandimiit savanik pisiniarnerput malunnaatilimmik iluanaarutiginnginnatsigu tassami nioqqutissiassat taakku nunatsinnut eqqunneranni akitsuut akilertussaagatsigu, Neqi A/S-imi pisortaq Per Jensen oqarpoq.

Neqi A/S-ip New Zealandimiit savaaqqap neqaanik pisiniartigani qulakkeeqqaarpaa Pilersuisup Pisiffiullu nioqqutissiassanik taakkuninnga pisiumanissaa. Nioqqutissat nalunaarsorneqartarnerannut inatsit naapertorlugu nioqqutissiarineqartut New Zealandimeersuunerannik nalunaaqutserneqarput.

Savaaqqat ikinnerusut
Savaatillit toqoraavinnut apuuttagaat ukiut ingerlaneranni amerliartorsimapput – ukioq manna tikillugu. Neqi A/S-ip naatsorsuutigaa ukiormanna savat savaaqqallu pisiarissallugit 18.000-20.000-t missaanniittut. Taamaattumik paasinarsereerpoq nioqqutissiorsinnaassuseq tamaat atorneqassapput amigaatigineqassasut 10.000-12.000-it missaanniittut.

Pissutsit taama inissisimanerat siunissaq isigalugu Neqi A/S-imut unammilernartuussaaq annertooq. Savaatilinniit toqoraavimmut apuunneqartartut amerlinngippata illuatungaanilu pisisartut piumasaat annertusiartortoq naammassineqassappat suliffissallu naleqaqisut pingaaruteqaqisullu pigiinnarneqassappat periarfissaq ataasituaassaaq, tassalu savaaqqat neqaannik nioqqutissiassanik avataaniit tikisitsineq.

Powered by Labrador CMS