Sanaartugassani kusanaatsoq sumiissanersoq suli qularnartoq
Qinngutta aqquserngata kujataata tungaaniittup qaavani napparussuit 80 miiterit angullugit portussusillit mikkiartornermi qullernik atortullit pillugit Kalaallit Airports qanoq suliniuteqarnersoq pillugu paatsuunganersuaqarpoq.
Angallannermut Sanaartornermut aamma Ineqarnermut Aqutsisoqarfiup (TBTS) Kalaallit Airportsillu attaveqaqatigiinnerat Sermitsiaq.AG-p allagaatinik takunnissinnaaneq atorlugu paasisaqarfigaa, paasinarsivorlu mittarfissualiortut avammut nalunaarutaat danskillu mittarfeqarfinnut tunngatillugu oqartussaanut nalunaarutaat assigiinngitsut.
Ingerlatsinermi pisortaq Peter Wistoft 19. februar ilisimatitsivoq, napparussuit mikkiartornermi qullernik atortullit mittarfiup kujataata tungaani inissisimasussat, timmisartullu tikittarnerannut aallartarnerannullu 6 procentimik pitsaanerulersitsisussat, piiginnarneqarsinnaanngitsut.
Kalaallit Airportsimi suliami pisortaq Jesper Nordskilde Sermitsiaq.AG-mut ukiup ataatsip matuma siorna oqaluttuaraluarpoq, Qinngutta aqquserngata kujataatungaaniittup qaavani napparussuit 80 miiterit angullugit portussusillit sanaartorneqanngiinnarnissaat mittarfissualiortussat iluatsissimagaat.
Aqutsisoqarfiup piumasaqaataa
TBST Sermitsiaq.AG-mut mailikkut ilisimatitsivoq ”mittarfissualiortussat siusinnerusukkut oqaatigisimasaat pillugit” aqutsisoqarfik oqaaseqarsinnaanngitsoq.
- Aqutsisoqarfik sillimaniarneq pillugu napparussuarnik mikkiartornermi qulleqartunik inissiinissamik piumasaqaateqarsimanersoq pillugu apeqquternut tunngatillugu, ilisimatitsissutigisinnaavarput piumasaqaat ICAO Annex 14, Volume I, pkt. 5.3.4.10 ff.-imi allassimammat, fuldmægtig Maria Michelsen TBST-meersoq allappoq.
Qinnuteqassaaq
Peter Wistoft Sermitsiaq.AG-mut ”kujataatungaanit mikkiartornermi atortussanik napparussuaqartussaaneranik pilersaaruteqartuaannartoqarsimaneranik” ilisimatitsereersorlu, ullut arfinillit qaangiummata Jesper Nordskilde, 25. februar 2020, oqarasuaatikkut ima oqaloqateqarsimavoq.
- Mikkiartornermi qulliit portussusissallu aalajangerneranut tunngatillugu, mikkiartornermi qullersuit naalineqarnissaanut qinnuteqalinnginnermi, KAIR oqaaseqaqqaarusuppoq, TBST-mut allagaatinik takunissinnaaneq atorlugu pissarsisimanermi atuarneqarsinnaavoq.
TBST ilanngullugu ilisimatitsivoq, Kalaallit Airportsimut oqaaseqaammik/ilitsersuummik mikkiartornermi qullersuit akuttoqatigiissaarnerisa takissusissaannik imaqartumik suliaqartoqartoq, taannalu suliaq suliffeqarfiup iluani taamaallaat pigineqartoq.
Tupaallannarpoq
Jesper Nordskilde TBST-imut mailiani, 6. februar ullulerneqarsimasumi, allassimavoq mikkiartulernermi qullersuit portussusissaanullu aalajangiinissamut piumasaqaatit mittarfiliortussanit tupaallaatigineqartoq.
- Maluginiarparput mikkiartulernermi qullersuit sanimut 420 miiterisut takitigissappata ILS Cat1-eqarlutik, taava portussusissaat 250 fodsiusariaqartoq. Tamanna, paasisagut eqqorsimappata, tupaallaatigaarput. Tamanna TBST ilisimatitsissutigisimanngilaa, suliami pisortaq allappoq, isumaqarlunilu silaannakkut angallassinermi teknikkikkut pissutsinut, februarimi 2017-imi TBST-mut qinnuteqaatini ilaasunut naapertuutinngitsoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...