Inatsisartut
Randi Vestergaard Evaldsen siulittaasutut qinerneqaqqippoq
Justus Hansen Demokraatini siulittaasup tulliatut qinerneqaqqippoq
Partii naalakkersuisoqataasup Demokraatit aqutsisuini qullersat septembarip 17-ani ataatsimiinnermi qinigaaqqipput.
Siuilittaasuuffik nutaaq
Partiimi siulittaasup Randi Vestergaard Evaldsenip, Anda Uldumip tupaallannartumik politikkimit tunuarnerata kingorna, februaarimi immikkut ittumik ataatsimeersuarnermi qinerneqartup unammillerteqarani siulittaasuunini sivitsorpaa.
Atuaruk: Randi Demokraatini siulittaasunngorpoq
Taamatut aamma politikkimut akisussaalluni siulittaasup tulliatut Justus Hansen qinigaaqqippoq, Nivi Olsen aaqqissuussaanermut akisussaalluni siulittaasup tulliatut qinigaavoq kiisalu Karen M. Lynge aningaaserisutut qinigaaqqippoq.
Siulersuisuunerit
Demokraatit naliginnaasumik nuna tamakkerlugu ataatsimiinnerminni siulersuisuunernik, ukiuni tulliuttuni marlunni siuttuusussanik qinersipput:
- Siulittaasoq: Randi V. Evaldsen
- Politikkimut akisussaalluni siulittaasumut tullersorti: Justus Hansen
- Aaqqissuussaanermut akisussaalluni siulittaasumut tullersorti: Nivi Olsen
- Aningaaserisoq: Karen M. Lynge
- Ilaasortaq: Jens Frederik Nielsen
- Ilaasortaq: Karl Peter Herlufsen
- Ilaasortaq: Jeppe Carstensen
Sinniisut
- Sinniisusaq siulleq: Gerda Vilholm
- Sinniisussap tullia: Esben Christiansen
Aningaasaqarneq pitsaasoq
Partiip aamma ilisimatitsissutigaa, akiitsoqartoqanngitsoq aamma aningaasanik tigoriaannarnik peqartoqaluartoq, tamannalu pingaarluinnartoq ukiuni aggersuni marlunni tulleriiginnarmik qinersisoqartussaammat 2017-mi kommuninut 2018-milu Inatsisartunut.