Siuittaasumik qinersineq
Randi Demokraatini siulittaasunngorpoq
Immikkut ittumik ataatsimeersuarluni qinersinermi Demokraatit nutaamik siulittaasortaarput
Randi Vestergaard Evaldsen.
Demokraatit siulittaasortaavat taama ateqarpoq.
Partiip ullumi arfininngornermi immikkut ataatsimeersuarnerani, partiip Nuummi allattoqarfiani ingerlanneqartumi, tamanna piviusunngorpoq.
Taamaasilluni Randi Vestergaard Evaldsenip unammillertini Justus Hansen Poul Hansenilu ajugaaffigai.
Taasinermi Randi Vestergaard Evaldsen qulingiluanik taaneqarpoq, tassanilu Poul Hansen aallartitanit taaneqanngilaq, Justus Hansenilu pingasunik taaneqarluni.
Anda Uldumip politikkimit tunuarnerata kingorna Randi Vestergaard Evaldsen partiini siulittaasuugallartutut inissisimasimavoq.
31-inik ukiulik Randi Vestergaard Evaldsen, qanittukkut aatsitassanut aningaasaqarnermullu naalakkersuisunngortinneqartoq, 2014-imi 108-nik taaneqarluni Inatsisartunut ilaasortanngorpoq.
Randi Vestergaard Evaldsen 1984-imi apriilip 13-ianni Sisimiuni inunngorpoq.