RAL aningaasartuutaasartunik ikilisaavoq
Royal Artic Line Kalaallit Nunaata nunallu arlallit allat akornanni toqqaannanngitsumik assartuisarnerup allanngortinneqarneratigut aningaasartuutaasartunik ikilisaavoq, umiarsuaatileqatigiiffimmi pisortaq Verner Hammeken nassuiaavoq.
Royal Arctic Linep Eimskipimik immikkut ittumik suleqateqartarnini unitsippaa, taamalu Kalaallit Nunaanni nunanut ukununnga toqqaannanngitsumik assartuisarunnaarluni: USA, Canada, Tuluit Nunaat, Savalimmiut, Holland Norgelu.
- Maannamut nunanit taaneqartunit Eimskip aqqutigalugu kiisalu Royal Arctic Linep assartukkanut allagartai atorlugit tikittakkanut tamanut nassiussassanik inniminniineq ajornartarsimanngilaq.
Tamana pissutigalugu ajoqusikkat, nuussinernut piffissartorneq, kiisalu aningaasartuutit assigiinngitsut Royal Arctic Linep akilertagai ajornartorsiutaasarsimapput, Royal Arctic Line umiarsuaatileqartigiiffiup nittartagaatigut sullitaminut ilisimatitsissuteqarpoq.
- 2021-imi marsip ulluisa aallaqqaataaniit ornigassanut taaneqartunut taakkunanngalu suli assartuisoqarsinnaassaaq, kisiannili Royal Arctic Line avaqqullugu tamanna pisassalluni. Taamaammat nassiussalerisarfik imaluunniit Eimskip aqqutigalugu nassiussineq pissanersoq sullitap nammineq aalajangertalissavaa, soorlu nunarsuup sinnerani nassiussivissanut allanut taamaattartoq, sullitanut ilisimatitsissutigineqarpoq.
Nassiussanut allagartat amerlanerusut
Ilanngullugu nassuiaatigineqarpoq, ”nassiussat Royal Arctic Linep attaveqarfiinit nassiussat Islandimi aqqusaarnerini tiguneqaraangata umiarsuaatileqatigiiffiup assartuinermut aalajangersagaanik piumasaqaataanillu imalinnik nutaamik nassiussanut allagartalerlugit Royal Arctic Linep assartortassavai”.
Umiarsuaatileqatigiiffimmi pisortap Verner Hammekenip allannguinerup iluaqutissartai arfinillit Sermitaq.AG-mut oqaatigai:
Sullitatta toqqaannartumik assartuitsiniarnerat ajornannginnerulersipparput
Reykjavik aamma Aarhus aqqutigalugit pingaarutilimmik angallaveqaratta, umiarsuaatileqatigiiffiit nassiussalerisartullu allat taamaalillutik angusinnaavaatigut
Ilisimasaqarfiginngisavut (USA-mi Europamilu niuerfinnut ungasissumiittunut containerinik nuussineq) suliarisassanngilagut
Niuerfinnut aningaasarsiorfiusunut (USA-mit Reykjavikkimut, nunavissuarmiit il.il.) aningaasartuuteqartassanngilagut
Kalaallit Nunaannut assartuinerup ilaatut akuersissummik tunngaveqarluta suli assartuiaannassaagut
Tamaasa ataatsimut isigalugit sullitatsinnut ajornannginnerulersitsissaagut, uagut umiarsuaatileqatigiiffiillu allat naammassisaqarnerusalissaagut, taamalu Kalaallit Nunaannik ajornannginnerusumik niueqateqartitsisalerluta.
Nunatsinni umiarsuaatileqatigiiffiup sullitaminut ilisimatitsissutigaa, at man arbejder på, ”aqqutinut taaneqareersunut aningaasartuutaasarsimagaluartut Kalaallit Nunaata Islandillu akornanni assartuinermut akinut apparsaataanissaat” sulissutigineqartoq.
Angallaviit aappalaartut pitsanngorsaaffigineqassasut
- Taamattaaq angallaviit aappalaartut: Helsingborgip, Aarhusip, Torshavnip kiisalu Rekjavikip tikinneqartarnerat pitsaanerulernissaat taamalu Kalaallit Nunaannut tassanngalu nassiussinerup ajornannginnerulernissaa sulissutigineqarpoq. Taamaaliortoqarsinnaavoq umiarsuit taaneqartut toqqaannartumik aqqutigalugit imaluunniit sullissisartunut ingerlaavartumik isumaqatigiissuteqartarnitsigut umiarsuliaviit attuumassuteqartut atorlugit, Royal Arctic Line nittartakkamigut nassuiaateqarpoq.