RAL: USA-mut niuernikkut aqqut ammangajalerpoq
USA-mut aqqummik nutaamik pilersitsinissaq pilersaarutigineqartoq Royal Arctic Line paasissutissiivoq
USA-mik niueqateqarneq qaammatini tulliuttuni pitsaanerulissaaq.
Royal Arctic Line USA-mukartalernissaa tusagassiutitigut nalunaarutigineqarpoq.
- Kalaallit Nunaata niueqatiginerata ajornannginnerulernissaanik periusissap ilaatut niuernikkut aqqutissanik nutaanik pilersitsisoqassaaq. Ilaatigullu USA-mut aqqummik nutaamik pilersitsinissaq pilersaarutigineqarpoq, Royal Arctic Line tusagassiutinut nalunaarummi allappoq.
Pilersaarutit malillugit 2020-mi februaarip qaammataani atuutilissasoq nalunaarutigineqarpoq.
RAL-ip pingaaruteqassusaa
Danmarkip ministeriunerata Mette Frederiksenip nunatsinnut pisortatigoortumik tikeraarnerminut atatillugu Royal Arctic Line ataasinngornermi pulaarpaa. Pisortaaneq Verner Hammeken naapippaa nunattalu niueqatiginerata siunissami qanoq ilillugu ajornannginnerulersissinnaanera oqaluuseraat.
- Royal Arctic Linep pulaarnissaata piffissaqarfigineqarnera nuannaarutigalugulu tulluusimaarutigaarput. Pingaartumillu ministeriunerup angallanneqarnermini sulisutta ilassinissaannut piffissaqarnera nuannaarutigaara. Misigivunga Kalaallit Nunaata niueqatiginerata ajornannginnerulersinnissaanik anguniakkatsinnut tunngaviusoq pillugu oqariartuutigisagut apuulluarlutigit. Mette Frederiksen malittaalu apeqqutissaqarluarput misigisimavugullu aaqqissuussinerput tamarmi ingerlalluartoq, Verner Hammeken oqarpoq.