Qipoqqaat: Pisassat ataallugit ukiumut pisarineqartarput
Nuup Kangerluani qipoqqarnik piniaqqusiunnaarneq aningaasaqarnikkut neqissaqarniarnikkullu piniartunut sunniuteqarnerlunnavianngilaq, Nuummimi pisarineqartartut amerlanngillat. Kommunimut qinigassanngortittoq Juaaka Lyberth taama isumaqarpoq.
Nuup Kangerluani qipoqqarnik piniaqqusiunnaarneq piniartut aningaasarsiornerannut neqissaqarniarnermullu ajornartorsiortitsilernavianngilaq. Qipoqqaat Nuup Kangerluani pisarineqartartut ukiuni kingullerni amerlanngillat, piniartunullu aningaasaqarnikkut sunniuteqartitsinerat malunnaataavallaarunnarani.
Kommuneqarfik Sermersuumi qinigassanngortittoq, Juaaka Lyberth (IA) piniarnermut naalakkersuisoqarfimmi qipoqqaat Nuummi pisarineqartartut pillugit akissuteqarfigineqareerluni taama inerniliivoq.
Naalakkersuisoqarfik naapertorlugu Nuummi qipoqqaq ataaseq 2019-imi pisarineqarsimavoq, 2020-imi ataaseq aamma pisarineqarsimalluni kiisalu ataaseq Nuup kangerluani qassutinut bundgarninut napittorsimasoq aamma pisarineqarsimalluni.
- Nuup Kangerluani qipoqqarnik pisaqaqqusiunnaarneq qipoqqarniartartut aningaasarsiornerannut, nunattaluunniit neqissaqartinniarneqarneranut akornuseerujussuarsinnaanngilaq, naalakkersuisoqarfiup ilisimatitsereernerani Juaaka Lyberth taama inerniliussaqarpoq.
Qipoqqaat 2010-mili piniaqqusaalermata kitaani pisassat ukiumut quliusarput. Naalakkersuisoqarfik ilisimatitsivoq ukiumut pisassat nungunneqarneq ajortut. Taamaammat pisassat sinneri ukiut tulliinut nuunneqarnissaanut periarfissaq atorneqarneq ajorpoq.
Assortuunneq pinngitsoortinniarneqarpoq
Juaaka Lyberthip qipoqqaat pisarineqartartut pillugit paasissutissat eqqortut piumasimavai kommuninut qineqqusaarnermi qipoqqaat assortuussutaalinnginnissaat anguniarlugu.
Nuup Kangerluani qipoqqarnik piniaqqusiunnaarneq arlalinnit isornartorsiorneqarsimavoq. Ilaatigut isornartorsiutigineqarluni piniartut aningaasarsiornerat neqissaqarniarnerallu soqutigineqanngitsoq.
Juaaka Lyberth ilisimatitsivoq Nuup Kangerluani qipoqqaat bundgarninik aseruisimatillugit taarsiisoqartarnissaanut tunngatillugu partii oqaloqatiginnikkumasoq.
Piniarnermut naalakkersuisoqarfik akissutimini ilisimatitsivoq Qeqqani aamma Qeqertarsuup Tunuani qipoqqaat bundgarninut akornutaanerusarnerat malunnartoq. Nuummi qipoqqaq bundgarninut nappussimasoq aamma nalunaarutigineqarsimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...