Sermersooq qipoqqarnik Nuup Kangerluani eqqissisimatitsilerpoq
Kommuneqarfik Sermersuumi kommunalbestyrelsimi amerlanerussuteqartut Nuup Kangerluani qipoqqaat eqqissisimatinneqarnissaannik siunnersuut akuerisimavaat.
Qippoqqaat Nuup Kangerluaniittut aallaallugit toqunneqaqqissanngillat.
Inuit Ataqatigiit, Demokraatit attaviittullu Michael Rosingip amerlanerussuteqarlutik siunnersuut marlunngormat kommunalbestyrelsip ataatsimiinnerani akuerivaat.
Kommunalbestyrelsimit taamaalilluni Aningaasaqarnermut Inuussutissarsiornermullu Ataatsimiititap Nuup Kangerluani qipoqqaat eqqissisimatinneqarnissaannik inassuteqaataa malillugu aalajangiisimavoq.
Michael Rosingp Nuup Kangerluani imarmiut angisuut eqqissisimatinneqarnissaannik 2019-imi siunnersuuteqarpoq. Taassumalu kommunalbestyrelsip aalajangernera nuannaarutigaa:
- Aalajangiineq nuannaarutigisupilussuuara. Aatsaat siullermeerluni, uumasut eqqissisimatinneqarnerisa nalingat takornariartitsisarnermilu nalingat tunngavigalugit eqqissisimatinneqalerput. Taamatut alloriartoqarnera annertuujuvoq, Michael Rosing kommunalbestyrelsi ataatsimeereersoq Sermitsiaq-AG-mi oqaloqatigineqarami oqarpoq.
Rosingip siunnersuuteqarami tunngavilersuutigaa, qipoqqaat takornariartitsisartunut naleqarluarnerat, pingaartumik umiarsuarnik takornariartitsisarnerup nalaani, illoqarfimmi takornariartitsisarnermik suliaqartartut tamarmik takornarianik takusassarsiortitsillutik angallassisarneranni.
Tiguneqarluartoq
Kommuneqarfik Sermersooq tusarniaanermi tusarniaanermut katillugit 27-nik akissutisisimavoq, taakkunannga ataasiinnaq suliniummut nutaamut pineqartumut isumaqataanani akissuteqarsimavoq.
Qipoqqaat eqqissisimatinneaqarnissaannik aalajangiineq Michael Rosingip politikkeritut suliaqarnerani kingullersaavoq, tassami qinigaaffik manna qaangiuppat politikkeritut tunuarniarluni aalajangersimagami.
- Oqaatigerusuppara politikkikkut suliaqarninni tamanna naggasiilluarnerusoq. Qipoqqaammi eqqissisimatinneqarnissaannik aalajangiineq politikkikkut suliaqartarninni naggasiilluarnerusoq, Michael Rosing Sermitsiaq.AG-mut oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...