Qinigassanngortittuni arnat procentitigut ikileriartut
Inatsisartunut qinigassanngortittut pingasuugaangata ataaseq arnaasarpoq. Kisitsisit takutippaat qinigassanngortittuni arnat procentinngorlugit amerlassusaat Inatsisartunut aamma kommuninut assigiittut.
Inatsisartunut qinigassanngortittut katillugit 189-it qinersinermut ataatsimiititaliamit akuerineqarsimalerput.
Taakkunannga arnat 56-iupput, angutillu 133-iullutik. Arnat amerlassusaat procentinngortikkaanni Inatsisartunut qinigassanngortittuni arnat 29,6 procentiupput.
Inatsisartunut 2018-imi qinersinermi qinigassanngortittut 230-iusuni arnat 73-iummata, procentitigut appariaat maanna2,1 procentpointiuvoq.
Arnat qinigassanngortittut procentitigut amerlassusaat:
- Inatsisartunut qinersineq 2018: 31,7 procent
- Inatsisartutnut qinersineq 2021: 29,6 procent
Arnat Inatsisartunut qinigassanngortittut aamma kommuninut qinigassanngortittut procentimikkut amerlaqatigiipput.
Naleraq amerlassutsimini ikinnerusunik arnartaqarpoq
Qinersinissanut qinigassanngortittuni angutit amerlanerujuartarsimapput. Inuit Pisinnaatitaaffii pillugit Siunnersuisoqatigiinni siulittaasoq Sara Olsvig Sermitsiaq.AG-mut apersorneqarnermini arnat amerlanerusut qineqqusaartalernissaannik ujartuivoq, arnat angutillu immikkoortinneqartarnerat tassuuna aamma annikillisinneqarsinnaammat.
Naleqqami qinigassanngortittut amerlassusaat qiviaraanni arnat procentitigut ikinnerupput, tassa qinigassanngortittuni 30-ni angutit 26-iugamik arnallu sisamaallutik.
- Kiffaanngissuseq tamatigut ataqqisorujussuuarput. Taamaammat suiaassuseq apeqqutaatinnagu uagut sinnerluta sassarusuttut akuerisarpagut, Pele Broberg Naleqqamiit oqarpoq. Taassuma erseqqissarpaa partii arlaannaatigulluunniit suiaassusermut aalajangersimasumut mattussinavianngitsoq.
Suleqatigiissitsisut aamma Nunatta Qitornai arnanik pingasunik aamma angutinik tallimanik qinigassanngortitaqarput.
Demokraatit naligiingajalluinnarput
Qinigassanngortittut suiaassusaasa amerlaqatigiinnerat eqqarsaatigalugu Demokraatit siuttuupput. Qinigassanngortittuni angutit aqqaneq-marluusut, arnat quliupput.
Siulittaasup oqaluttuaraa qinigaaffimmi kingullermi partii arnanik nukittuunik arlalinnik Inatsisartuni issiasuutitaqarsimasoq.
- Aamma partiitsinni suiaassusermik aallaaveqarluta oqaluttuunngilagut. Arnaaneq angutaanerluunniit apeqqutaatinnagu sammisat suulluunniit ilaasortatta eqqartorusutaat oqallisigisinnaasarpagut, Demokraatini siulittaasoq oqarpoq nangillunilu:
- Partiimi qinigassanngortitatta suulluunniit oqallisigisinnaavaat. Sammisat oqimaannerusut, soorlu akileraartarneq inuussutissarsiutillu angutaannaat oqallisigisariaqanngilaat. Suiaassutsimik aallutaqarata inummik isummanillu aallutaqarnerput tamanut orniginartuulluinnartoq isumaqarpoq, Demokraatit siulittaasuat Jens-Frederik Nielsen Sermitsiaq.AG-mut oqarpoq.
Siumut aamma Inuit Ataqatigiit arnanik amerlanerusunik sassartitaqarput. Siumut 60-inik sassartitaqarpoq, taakkunannga 16-it arnaallutik. Inuit Ataqatigiit 43-nik sassartitaqartoq, taakkunannga 16-it aamma arnaallutik.