Arnat amerlanerit pissaanermik tigusiniarsinnaasariaqarput
Inuit Pisinnaatitaaffii pillugit Siunnersuisoqatigiinni siulittaasoq Sara Olsvig isumaqarpoq, arnat kommunini politikkeriusut ikippallaartut, arnallu nunami maani suli naligiimmik pineqaratillu immikkoortinneqarpallaartut.
Kommuninut qinersinissami qinigassanngortittut akornanni arnat 29,5%-iinnaapput. Tamanna kommunalbestyrelsinut ilaasortat maannakkut katitigaanerannut assinguvoq, arnammi maannakkut ilaasortaasut 29,6%-eraat, tassa ilaasortat pingajoraarterutaat ataallugit.
- Arnat amerlanerit kommunalbestyrelsinut qineqqusaannginneri assut ajuusaarnarpoq, Inuit Pisinnaatitaaffii pillugit Siunnersuisoqatigiinni siulittaasoq Sara Olsvig oqarpoq.
Nalaagaaffiit Peqatigiit misissuisimanerat naapertorlugu, arnat politikkimi peqataasarnerat pitsaanerusumik aalajangiissuteqartoqartarneranik partiillu assigiinngitsut akornanni suleqatigiinnerulertoqartarneranik nassataqartarpoq. Tamatumunnga peqatigitillugu arnat politikkimik suliaqartut oqaluuserisassanik salliutitsisarnermi allannguisarput - amerlasuutigut oqaluuserisassat innuttaasunut tunngassuteqarnerusut arnat peqataagaangata politikkikkut sammineqarnerusarput.
Kommunalpolitikkimiinnaanngitsoq
Kommuninut qinersisoqarnissaata saniatigut Inatsisartunut qinersisoqartussaavoq. Inuit Pisinnaatitaaffii pillugit Siunnersuisoqatigiit partiinut tamanut kaammattuutigaat, taasinermi allaffissami naligiissitaaneq isumannaaqqullugu.
- Suli angumerineqarsinnaavoq - matumanili pisariaqarpoq nunamit tamarmit arnat amerlanerit pissaanermik tigusinissamik anguniagaqarlutik qinigassanngortinnissaat, Sara Olsvig oqarpoq.
Kingullermik Inatsisartunut qinersisoqarmat ilaasortanngorlaanit 31-usunit arnat aqqaneq-marluupput, tassa ilaasortanngortut 38,7 procentii. Taamaammat partiit arnanik amerlanerusunik politikkerinngortitsinissamik ukkataqarnera naammanngilaq.
- Arnat amerlanerit politikkimut isertinneqarnissaannut allatut iliuuseqarfigineqarsinnaasoq tassaavoq, arnanik qinigassanngortittnik taasinissaq, Sara Olsvig kaammattuivoq.
Kalaallit Nunaanni Inuit Pisinnaatitaaffii pillugit Siunnersuisoqatigiit arlaleriarlutik, kingullertigullu arnat pisinnaatitaaffiit pillugit Naalagaaffinni Peqatigiinni ukioq manna februaarip qaammataani misilitsinneqaranni, Naalakkersunut kaammattuutigineqarpoq, arnat nunatsinni politikkikkut atugaat misissoqqullugit.
Ilamineeraannanngui takuneqarsimasut
Politikkimulli peqataaneq Kalaallit Nunaanni suiaassutsit akornanni naligiinngissuteqarneq kisimi annertuujunngilaq.
2020-mi Inatsisartuni arnanut kinguaassiuutitigut innarliisoqartarnera sammineqaqaaq, aamma Siumumi Naleqqamilu allattaasimasoq Michael Petersen sammineqaqaluni.
- Ajoraluartumik isumaqarpugut, arnat suliffimminni pisortallu ingerlataqarfiini taamatut misigitinneqartarnerat pillugu sammineqartupilussuup tamanna ilagiinnaraa. Nunatsinni arnanut isiginnittarnerup ammanerusumik oqaluuserineqarnissaa pisariaqarpoq - oqariartuut amanna ingerlateqqikkusupparput, Sara Olsvig oqarpoq.
- Peqatigitillugu arnanut innarliillutillu nakuusertartut suli amerlasoorujussuupput. Taamatut assigiinngisinneqarnerat akiorniarlugu annertuunik suliniuteqartoqartariaqarpoq - minnerunngitsumillu inuiaqatigiinni tamanni isummertaaseq allanngortariaqarpoq, Sara Olsvig naggasiivoq.
Ataasinngornermi sorsuuteqarluarisi, Inuit Pisinnaatitaaffii pillugit Siunnersuisoqatigiinni siulittaasoq oqarpoq.