Qeqqata Kommuniani suleqatigiinnissamut isumaqatigiissut aajuna

'Oqartussaaqataaneq, ataatsimoorneq aamma ineriartorneq'.

Qeqqata Kommuniani Siumup, Inuit Ataqatigiit aamma Partii Naleqqap suleqatigiinnissamut isumaqatigiissutaat, Sisimiuni ippassaq marlunngornermi kommunalbestyrelsimut saqqummiunneqartoq taama nipeqarpoq.

Kommuni Sisimiut Kangerlussuullu akornanni aqqusinniornissamut suliniummik ingerlatitseqqissagaat qulequttat ilagaat.

- Suleqatigiit Kangerlussuup tungaanut aqqusineqalernissaa tamakkiisumik tapersersorpaat. Isumaqatigiissutaavorlu misissueqqissaarnerit aningaasalersorneqarnissaanullu misissuinerit piaartumik nanginneqarnissaat, suleqatigiinnissamut isumaqatigiissummi ilaatigut allaqqavoq.

Atuaruk: Malik Berthelsen: – Borgmesterinngorniarlunga qinigassanngortippunga

Ikiaroornartoq sequtserisoq
Partiit naapertorlugit kommunimi ikiaroornartoq ajornartorsiutaasorujussuuvoq.

- Tamannalu ilaatigut kommunimi ilanngaaserisumik atorfinitsitsisoqarnissaa Naalakkersuisunut noqqaassutigineqassaaq.

Partiit pisortanit ikiorsiissutit imigassamut ikiaroornartumullu atorneqarsinnaannginnissaat sulissutiginiarpaat.

- Pisortanit ikiorsiissutit inuuniarnikkut pisariaqartitanut ikiorsiissutaapput. Taamaattumik suleqatigiit misissorniarpaat pisortanit ikiorsiissutit imigassamut ikiaroornartumullu pisissutigineqarsinnaajunnaarnissaat inatsisitigut periarfissaanersoq, Siumut, Inuit Ataqatigiit aamma Partii Naleraq ilaatigut taama allapput.

Atuaruk: Siumut Qeqqata Kommuniani ajugaavoq

Qeqqata Kommuniani suleqatigiinnissamut isumaqatigiissut allaaserisap talerpiata tungaaniittoq tooriarlugu atuarsinnaavat