Qeqqani aalakoornartortalinnik sassaalliinerit tuniniaanerillu inerteqqutaalerallarput
Qeqqata Kommuniani borgmesterip kissaataa malillugu Naalakkersuisut Qeqqata Kommuniani tamarmi imigassanik aalakoornartortalinnik tuniniaanerit sassaalliinerillu inerteqqutinngortikkallarpaat.
Naalakkersuisut Qeqqata Kommunianit borgmester Malik Berthelsenimit imigassat aalakoornartortallit 2,25 volumenprocentimit qummut volumenprocenteqartut tamarmik Qeqqata Kommuniani tuniniarneqartarneri sassaalliutigineqartarnerilu inerteqqutigineqarallarnissaanut qinnuiginninnera ullumi eqqartorpaat.
Borgmesterip qinnuiginninnera Naalakkersuisunit akuerineqarpoq, unnugumiillu 25. januar 2022 ilanngullugu inerteqqut atuutsinneqalerluni.
- Piffissami matumani neriniartarfiit imerniartarfiillu nal. 22.00-ip nal. 05.00 akornanni matoqqaqquneqarneratnalaanni angerlarsimaffinni imigassamik atuineq oqartussanit qanimut malinnaaffigineqassaaq, Namminersorlutik Oqartussat tusagassiorfinnut nalunaarutiminni allappoq nangillunilu:
- Angerlarsimaffimmi pitsaanngitsumik ineriartortoqarnera meeqqanut ilaqutariinnullu taamaallaat eqquinavianngilaq, kisianni aamma Covid-19-ip tuniluunnerata siaruarnissaanut annertunerusumik aarlerinaateqalersissavaa imigassartorfiusumi ataatsimoortoqartillugu inuit tunillaassuuttoqarsinnaanera eqqumaffigineq ajormassuk.
Tunillatsittut 500-t sinnillit
Qeqqata Kommuniani tunillatsissimasut maanna 500-t sinneqarput, ullullu tamaasa suminngaanniit tunillatsissimanerminnik ilisimanninngitsunik nutaanik paasisaqartoqartarpoq.
Qanermut assiaquteqarnissamut, akiuussusersimanissamut aamma inuit katersuuffigisinnaasaanni inuit isersimasinnaasunut tunngatillugu Sisimiuni killilersuutit Naalakkersuisunit aamma atuuttussanngortinneqaqqammerput.
- Kommunimi sumiiffinni arlalinni suminngaanniit ilisimaneqanngitsumik annertuumik tuniluuttoqarnera tunngavigalugu Naalakkersuisut Qeqqata Kommuniani imigassamik aalakoornartortalinnik tuniniaasarnerit sassaalliuteqartarnerillu unnugumiit 11. januar 2022 nal. 22.00-miit – 25. januar 2022 ilanngullugu inerteqqutigineqarallarnissaannik qinnuiginninnerat tusaatissatut tiguniarlugu aalajangerput, namminersorlutik oqartussat allapput.