Illoqarfinni marlunni killilersuutit atuutsinneqalerput
Aasianni Sisimiunilu killilersuutit pingasunngorneq 12. januar 2022 nal. 06.00 aallarnerfigalugu atuutsinneqalissapput suminngaanneernerinik paasineqanngitsunik tuniluuttoqalermat.
Sisimiuni Aasiannilu tuniluunnerup suminngaanneerneranik ilisimaneqanngitsoq paasineqarpoq, taamaattumillu killilersuisoqalerpoq. Nunatta nakorsaaneqarfia nittartakkamini taama allappoq.
Killilersuuteqalernikkut ilaatigut coronamut atatillugu uppernarsaateqarnissaq, init tamani iserfigineqarsinnaasut isersimasorisinnaasaasa killilerneqartarnissaat aamma qanermut assiaqummik visirimilluunniit atuisarnissaq piumasaqaataalerput.
- Illoqarfinni nunaqarfinnilu killilersuigallarnerit pillugit nalunaarummi 4. januar 2022-mi atuutilersoq naapertorlugu Sisimiuni Aasiannilu killilersuutit maanna atuutilerput. Killilersuutit 12. januar 2022 unnuaani nal. 06.00-imiit atuutilissapput tunillaassuunnerullu uninnissaata tungaanut imaluunniit tunillaassuunnerup suminngaanneernerata ilisimaneqalernissaata tungaanut atuukkallassallutik, nunatta nakorsaaneqarfia nittartakkamini allappoq.
Nuna tamakkerlugu tunillatsissimasut nutaat 524-it marlunngornermi nalunaarutigineqarput.
Taakkunannga 14-it Aasianni, 23-llu Sisimiuni paasineqarsimapput.
Illoqarfiit allat, soorlu Narsaq, Maniitsoq, Ilulissat aamma Nuuk killilersuuteqareerput.
Killilersuutit pillugit nunatta nakorsaaneqarfiata nittartagaani atuarnerusinnaavutit.