Qaqortumi katersugaasivik nutaamik pisortartaartoq
Lasse Meyer, Ilisimatusarfimmi kulturilerinermi inuiaqatigiilerinermilu cand.mag., Qaqortup Katersugaasiviani pisortanngorpoq.
Lasse Meyer Qaqortup Katersugaasiviani 1. august pisortanngorpoq. Taassuma Dan Ullerup, 2019-imili pisortaasimasoq paarlappaa.
Lasse Meyer Københavns Universitetimi itsarnisarsiornermi antropoligimilu bacheloritut ilinniarsimavoq, Ilisimatusarfimmilu kulturilerinermi inuiaqatigiilerinermilu cand.mag.-itut ilinniagaqarluni, Kommune Kujalleq nittartakkamini allappoq.
Kommune naapertorlugu Lasse Meyer nunatsinni Danmarkimilu katersugaasivinni sulisareerpoq, Nanortalimmilu katersugaasiviup pisortaasimalluni.
- Katersugaasiviup suliassaqarfiani ineriartortitsineq suliatigut pitsaasumik angusaqarsinnaanermik piumasaqaatitaqarpoq aammalu suliassaqarfinni akimut ajunngitsumik suleqatigiissinnaanermik. Lasse piffissaq eqqorluarlugu takkuppoq, tassami katersugaasivinni siulersuisut aaqqissugaanerat nutaanngortissagatsigu, taamaammat Lassep suleqatiginissaanut qilanaaqaanga, kommunimi ingerlatsivimmi pisortaq Kattie Egede Motzfeldt oqarpoq.
Katersugaasivimik avataanut isikkivilik
Qaqortumi katersugaasivik saqqummersitanik anginerusunik ukiut kinguliini annertuumik suliaqarpoq, Washingtonimilu katersugaasivissuaq nunarsuaq tamakkerlugu ilisimaneqarluartoq, The Smithsonian aamma suleqatigisimallugu.
Katersugaasiviup pisortarisimasaata Dan Ullerupip Hans Hedtoft pillugu saqqummersitsinerit aamma Jim Lyngvildip puisip amianik suliai katersugaasivimmi saqqummersinneqarnissaoi sulissutigisarsimavai.