Saqqummersitsineq oqallisaasoq Great Greenlandip illoqarfiani saqqummersinneqarpoq
Jim Lyngvild aamma Great Greenland suleqatigiillutik saqqummersitaat Qaqortumi arfininngormat ammarneqarpoq.
Jim Lyngvildip atisanik saqqummersitsimmat upernaaq oqallisaangaatsiarpoq.
Kalaallit kulturiat ilisimasaqarfiginagu saqqummersitsisimasoq ilaatigut isornartorsiorneqarpoq.
Saqqummersitsineq Qaqortumi maannakkut takuniarneqarsinnaalerpoq.
- Eqqumiitsuliorneq kiffaanngissuseqarfiusoq
Qaqortumi saqqummersinneqarnera illoqarfimmut pingaaruteqartoq, katersugaasivimmi pisortaq Dan Ullerup tusagassiunut nalunaarummi oqarpoq.
- Saqqummersitsineq una katersugaasivitsinni saqqummiunnissaa pingaarsimavoq. Great Greenland Qaqortumi inissisimasuuvoq, Qaqortullu Katersugaasivia aamma illoqarfigisatsinni inissisimasuulluni. Kulturikkullu sammisaqartitsivittut eqqumiitsuliornerup killeqanngitsuunissaanik assut pingaartitsilluta, Dan Ullerup oqarpoq, nangillunilu:
- Saqqummersitap Kalaallit Nunaanneersuunnginnera pillugu isornartorsiuisoqarsimavoq, tamannalu ilumoorpoq. Eqqumiitsuliornermillu killilersuiniarneq naalakkersuinarnerlu isumassaqanngilaq.
Saqqummersitsineq decembarip 23-ata tungaanut ingerlassaaq.