Qanermut assiaqutit atuutsinneqalerput: Mittarfeqarfiit nakkutilliinerulerput
Angalasut kisimik mittarfinni aqqusaartarfinnut isersinnaapput. Mittarfeqarfiit aqqusaartarfinni pingasunngorneq aallarnerfigalugu nakkutilliinerulerpoq.
Innuttaasut billetseqanngitsut iseqqusaanngillat.
Innuttaasut billetsillit, kisianni qanermut assiaquteqanngitsut, aamma iseqqusaanngillat.
Angalasut qanermut assiaquteqartalernissaannik Naalakkersuisut peqqussuteqalertullu, Mittarfeqarfiiit taama nalunaarput. Angalasut aqqusaartarfii mittarfiit tamarmik pingasungornermi qanermut assiaquteqarfinngorput, nakkutilliinerlu aamma sukaterneqarluni.
- Angalasussat taamaallaat mittarfimmiissinnaapput, tassa timmisartup aallarnissaanut
ilaasut angalanissamut billetteqartuniit. Allat tamarmik aqqusaartarfiup isaariaani
iseqqusaasassanngillat, pisortaaneq Henrik Estrup oqarpoq.
Angalasussat tamarmik mittarfimmiinnerminni qanermut assiaquteqassasut imaluunniit kiinnamut assiaquteqassasut, Mittarfeqarfiit tusagassiorfinnut nalunaaruteqarlutik ilisimatitsipput.
- Tamakkuninnga atugaqanngikkaanni isaariami iseqqusaasoqartassanngilaq.
Kangerlussuarmi innuttaasut iseqqusaajunnaartassapput
Kangerlussuarmi najugaqartut mittarfimmi aamma atuisuupput. Angalasulli aqqusaartarfiat innuttaasunut najugaqartunut matuneqartalissaaq, Danmarkimiit angalasut mittarfimmiitsillugit.
- Piffissat sinnerini tamaani najugallit isersinnaapput. Taamaattorli aqqusaartarfimmi, cafeteriami, neriniartarfimmi assingisaanilu qanermut kiinnamulluunniit assiaqutit atorneqassapput. Taamaattorli nerrivimmit nerisaqartilluni pinnani, allassimavoq.
Naalakkersuisut nalunaarummik nutaamik marlunngornermi saqqummiussipput. Angalasut tamarmik, atlantikoq qulaallugu angalasut aamma nunap iluani angalasut tamarmik qanermut assiaquteqartalissapput. Sulisut aamma qanermut assiaquteqartalissapput.
